Shillong, Rymphang 18
Ka Mawlai Impact ka la rah ïa ka song pisa kaba T. 1 lak hadien ba ka la khur ïa ka nam lahduh ha ka lympung ïalehkai 10 A-Side Open to All Football Tournament 2024 ba la pynlong da ka Synrop Football Club.
Kane ka nam jop ka la wan urlong hadien ba ka la lah ban pynliem noh ïa ka United Warrior (Lawmali) da 5-0 kol ha ka jingïakhun final kaba la long ha ka sngi Saitjaiñ ha madan Heh Mini Stadium kaba ha Mawlai Phudmuri.
U Donlad Diengdoh u la khur ïa ka hat-trick hadien ba u la ïoh ban thep lai kol ha ka minit kaba 42, 57 bad 70, katba ïa ki ar kol la thep da u Batskhem Thangkhiew ha ka minit ba 20 & 45. Kumta ka Mawlai Impact ka la ïohpdiang ïa katei ka khusnam ryngkat ka trophy bad ka United Warrior ka la ïoh T.50,000 ba la sam da u President ka Mawlai Sports Club u Bah Marcel Kharbani kum u kongsan, kumjuh u Bah Sukher Sohlang, Assistant Rangbah Shnong Mawlai Phudmuri bad u Bah George Syiem.
Ïa ka nam Best Goalkeeper la khur da u Rajat Paul Lyngdoh, Player of the Tournament ka leit sha u Wanboklang Lyngkhoi. Kitei baroh ar ngut kine ki rangïalehkai jong ka Mawlai Impact.
