Shillong, Rymphang 18
Ka Hyderabad ka la lah ban ïalehkai bha na ka bynta ban tam ïa ka Meghalaya ha ka inning kaba nyngkong jong ka final Ranji Trophy (Plate Group) kaba la long ha ka Sngi U Blei ha Hyderabad.
Ka Hyderabad kaba la kynjoh sha ki 25/2 hynnin ka sngi, ka la duna ha ka inning kaba nyngkong da 279 run hadien ba ka Meghalaya ka la lah ban buh ïa ka thong da 304 run bad shah pynhap 10 wiket.
Hynrei hynne ka sngi ki nongtied ka Hyderabad ki la lah ban ïalehkai bha na ka bynta ban kynjoh sha ki shispah run lyngba u K. Nitesh Reddy (122) bad u Pragnay Reddy (102 not out) na ka bynta ban pynlong ïa katei ka kynhun ban kynjoh sha ki 350 run.
Hynrei hadien ka Hyderabad ka la shah pynhap lut baroh ki nongtied na ka daw ka jingtbit ki nongkawang bol ka Meghalaya.
U Chengkam Sangma, uaba la lah ban khur 2 wiket hynnin ka sngi, u la lah ban khur biang sa 3 wiket ha ki 14 over. U Akash Kumar Choudhury, uba la ïoh ban khyrwit ïa ka shiteng spah run hynnin ka sngi, u la khur 3 wiket (3/59) ha ki 21 over. U Dippu Sangma u la lah ban khur 3 wiket (3/68) ha ki 16.5 over. U khlur ïalehkai Indian Premier League u Tilak Varma, u la shah pynkhyllem noh ha u Dippu bad kamai 44 run.
Wat la ka Hyderabad ka la lah ban tam da 46 run ha ka inning kaba nyngkong, hynrei ki nongtied ka Meghalaya kin hap ban ïalehkai bha ha ka lah sngi U Blei na ka bynta ban kynjoh sha ka thong ha ka inning kaba ar.
