Shillong, Rymphang 18
Ka kynhun ki rangïalehkai phutbol ka Jylla ka la mih na ka nongbah ban leit ïa aireng ha ka wat ba khatduh (final round) jong ka lympung ïalehkai 77th Santosh Trophy ka ban long ha nongbah Itanagar, Arunachal Pradesh.
Shwa ba kane ka kynhun kan mih na ka nongbah, ka la don ka jingïalang ban kitbok ïa kane ka kynhun ha kaba la don lang u Secretary ka Meghalaya Football Association u Bah Sunesh Syiem, ki dkhot jong ka Senior Cell, u coach lem bad ki rangïalehkai.
Ha kane ka kynti ïakhun kaba mynta, kin don baroh 12 tylli ki jylla ki ban ïaknieh ban rah ïa ka nam lahduh ha kane ka lympung. Ka Meghalaya ka la don ha ka Group-A kiba kynthup ïa ka Arunachal Pradesh, Goa, Assam, Services bad ka Kerala.
Ha kane ka lympung, ka Meghalaya kan ïakhun nyngkong pyrshah ïa ka Services ha ka 21 tarik, ha kaba yn bud pat sa ka jingïakhun pyrshah ïa ka Assam ha ka 23 tarik, ïa ka Kerala ha ka 25 tarik, Goa ha ka 28 tarik bad ïa ka Arunachal Pradesh ha ka 1 tarik u Lber.
Haba pynpaw ha kane ka sngi, u Bah Sunesh u ong ba ha kane ka kynti kaba mynta kumba phraphew na ka shispah ki rangïalehkai ki dei kiba la don bynta bad ka kynhun kaba la rung shaduh ka phainal ha u snem ba la dep bad la don shuh shuh katto-katne kiwei pat ki rangïalehkai.
Ha kane ka kynti kaba mynta u Bah Khlain Pyrkhat Syiemlieh un shimti biang kum u coach ïa kane ka kynhun, kumjuh u Bah Playerson Syiemlieh kum u Assistant Coach, Bah Freddy Kharpran kum u Manager bad ka Lucky Mary Marbaniang (Physiotherapist).
Ki kyrteng ki rangïalehkai ka Jylla ki long:
Goalkeeper: Siwel Rymbai, Daraphun Talang & Lionel Daryl Rymmei.
Defender: Wanboklang Lyng-khoi, Donborlang Nongkynrih, Ban -skhemlang Mawlong, Brolington Warlarpih, Over Kindness L. Mawnai, Dawanplielad Myrchiang & Lukas Syngkli.
Midfielder: Babysunday Mar-ngar, Kitboklang Pale, Nikelson Bina, Damonlang Pathaw, Dameki Khongstia, Dawanchwa Carlos Challam, Robert Khongjoh & Baiaikara Swer.
Forward: Sheen Stevenson Soh-ktung, Nelson Rymbai, Shaiborlang Kharpan & Chesterpoul Lyngdoh.
