Washington, Rymphang:
Uwei u nonghikai na United States, u la shah kem noh hadien ba u la ai jingkylli bad phah thoh ‘assignment’ ia ki khynnah skul halor kumno ba pyniap ia la u jong u para ba iashong klas lang.
Ia utei u nonghikai ym shym la pynpaw kyrteng satia hynrei ka ïingbishar ha kane ka por ka la rai ban phah kem noh ia u haba iadei bad katei ka jingai jinghikai kaba long be-aiñ bad kaba lah ban ktah ia ka imlang- sahlang, ha kaba u la buh jingkylli bad phah jubab ia ki khynnah ba kumno ki dei ban leh ba kin lah ban pyniap ia ki para-lok ba ïadon lang bad ki hapoh ka kamra pule.
Utei u nonghikai u dei uba shim ia ka sobjek ‘English’. Kane ka la jia hapoh ka skul Crestwood Middle School kaba don hapoh Chesapeake jong ka nongbah Virginia. Kane ka la jia ha u Kyllalyngkot jong u snem 2022 hadien ba kitei ki khynnah skul ki la ai ia ka jubab da kaba thoh hapoh ki ‘tablet’ jong ki kumba ju leh haba ai jingkylli ne phah thoh ‘assignment’ da ki nonghikai.
La ioh jingtip ba katei ka jingkylli ka dei kaba la wanrah da uwei na kitei ki khynnah skul kiba don ha katei ka klas hi. Ha kawei ka liang kaba sngew lyngngoh ka long ba utei u nonghikai ruh u shim bad ai jinghikai pynban ia baroh kiba don ha katei ka kamra klas ha ka jaka ba un pynbeit bad mai ne hikai ia utei u khynnah uba kylli bad wanrah ia kum katei ka jait jingkylli kaba sniew.
Kumta, la ong ba dei lyngba ka jingleit iathuh jong uwei na kitei ki khynnah skul ha ki kmie-kpa jong u ba ki pulit kin sa ioh jingtip bad wad bniah bha halor kane.
La iathuh ruh ba utei u nonghikai u dang leit pyniasoh sha katei ka skul naduh ka 31 tarik u Nailar jong u snem 2021 haduh ka 8 tarik u Iaiong jong utei hi u snem 2022 ba la lap ia katei ka jinghikai be-aiñ jong u.
