Guwahati, Rymphang:
Kum shi bynta ban ïai bteng ha kaba ïadei bad ka jingïakhun pyrshah ïa u drok bad ka jingkhaïi beaiñ ïa u drok, ki pulit jong ka Assam ha ka sngi Thohdieng ki la ïoh ban kurup da kumba san tylli ki synduk sabon kiba don ïa 70 Grams u Heroin.
Kum shi bynta ban pyntreikam hadien ba la ïoh jingtip halor kane ka jingjia, ki pulit jong ka Assam ki la pynlong ïa ka jingleit khynra ha Mirza kaba hap hapoh Kamrup distrik bad kurup ïa u Heroin na kawei ka kali Alto ha ka por ba la pynlong ïa ka jingkhynra. Une u drok kumba la khmih bniah, la ong ba u shong dor T. 1 klur. Shuh shuh la ïathuh ba ki la don lai ngut ki briew kiba la shahkem ha ka por ba la don kane ka jingleit khynra, ïa kine kiba la shahkem la tip kyrteng kum u Drona Gogoi, Nayanjyoti Saikia bad u Sunil Gogoi.
Ki pulit ki la ïoh ban kurup ïa ki song jong une u drok ha ryngkat kane ka kali. Ka jingpyntreikam ka dang ïaid shakhmat na ka bynta ban pynlong ïa ka jingtohkit kaba bniah na kine ki briew kiba la shahkem.
