Athens, Rymphang:
Ka ïingdorbar thaw-aiñ jong ka Greece ha kine ki khyndiat sngi ka dang shu dep pdiang bad ai jingkyrshan ia ka jingiathoh shongkurim para kynthei-shynrang bad kane ka la jia wat hapdeng ka jingpyrshah jong kiba bun balang khamtam na ki nongpynïaid niam jong ki Orthodox Church ha katei ka ri.
Kumta, la ong ba shisien ba la pynkylla aiñ ia katei ka aiñ rew ‘Bill’, ka Greece kan sa long ka ri kaba 37 ha ka pyrthei ka ban pdiang bad pynlong aiñ ia ka jingiathoh shongkurim para kynthei- shynrang wat la katei ka ri ka dei ka ri kaba dun da ki riewngeit Khristan.
Ia katei ka aiñ rew la ai jingkyrshan da ka seng jong u Myntri Rangbahduh Kyriakos Mitsotakis kaba la ioh ia ka jingkyrshan jong 176 ngut ki Myntri ka ïingdorbar thaw-aiñ napdeng ki 245 ngut kiba don ha kitei ki 2 sngi jong ka jingmir jingmut bad ki jingiatai nia haba iadei bad katei ka kam.
Kumta la ong ba ha katei ka sngi, tang mar ia ïohsngew ia kane ka khubor, bun ki paidbah ki la ia mih ban rah ia ki lama sympyllieng ne ‘Rainbow Flags’, ha kaba katei ka lama ka ïeng na ka bynta ka hok jong ki paidbah kiba kwah ban iashongkha para kynthei-shynrang.
Wat la da ki phew lane ki spah ngut ruh ki nongialam lane ki Myntri thaiwaiñ katei ka ri ki pyrshah jur haba iadei bad katei ka aiñ rew, hynrei ka jing-ai jingkyrshan pat jong ki seng ka liang pyrshah ka la pynpaw shai ba katei ka aiñ rew shen kan sa kylla aiñ noh.
Haba iadei bad kane, ki seng LGBTQ ki la ai jingiaroh ia ka ïingdorbar thawaiñ jong ka ri kaba la ai jingkyrshan ia ka jingthrang jong ki kaba la shah ñiew be-aiñ bad shah leh shiliang khmat baroh shi katta.
