Shillong, Rymphang 19
Kan dei ka sien kaba nyngkong eh ba ïa kawei na ki jingïalehkai la lah ban wanrah ha kane ka nongbah na ka bynta ka Khelo India University Games ka ban sdang naduh ka Sngi Ba-ar ha SAI Training Centre, Shillong.
Kane ka nongbah ka la ïoh ban pynlong ïa ka jingïalehkai siatkhnam (archery) bad ka rukom pynkhreh-pynkhrum ka la long kaba itynnad bad ïaryngkat kyrdan bad ki ri ka pyrthei (international). Pynban kaba sngewsih pat ka long ba ka Jylla kam shym la lah ban sei wat tang iwei na ki nongïalehkai ki ban ïashim bynta ha kane ka lympung. Ka daw jong kane ka dei namar ka jingbym shim khia ka skulbah jong ka North Eastern Hill University (NEHU) bad kam ju don ki prokram ai jinghikai ba pura hashwa ba kan phah ïa ki nongïalehkai ban leit ïashim bynta ha ki lympung ïalehkai Inter University kiba la ju pynlong manla u snem ha kylleng jong ka ri India.
Kumba ka paw hapoh kane ka skulbah NEHU, ka don ka tnat treikam kaba la ju tip kum ka Sports Department kaba ju pynïaid ïa ki lympung ïalehkai Inter College bapher bapher hapoh ka Jylla bad kaba don ruh ïa ka jingkitkhlieh na ka bynta ban ai jinghikai ïa ki kynhun ïalehkai bapher bapher hashwa ba kin leit ïashim bynta ha ki lympung ïalehkai Inter University bad kine ki lympung ki dei ki jingïaknieh ban ïoh rung sha ka Khelo India University Games.
Kat kum ki khubor ba la ïoh lum la ïathuh ba ki kynhun ki ban ïoh rung sha ka Khelo India University Games ki dei tang na kito kiba don ha ka thup kaba phra (top eight). La ong ba ka NEHU ka dei ban phah da ki kynhun ïalehkai kiba kynsai bad kiba la ïoh shwa ka jingshah hikai kaba paka khnang ba kin lah ban jam shaduh ki kyrdan ba kham shakhmat ym ban shu phah khlem da ai jinghikai shwa ïa ki.
Ym lah ban len ba ka Jylla ka don bun bah ki nongïalehkai kiba kynsai ha ki jingïalehkai bapher bapher bad kiba la ju wanrah burom ïa ka jylla da kaba khur takma ha ki lympung ïalehkai bapher bapher shabar jylla (national level).
Haba ïakren bad u nongthoh khubor, u Director ka Sports Department jong ka skulbah NEHU, u Prof. L. Kma u la ïathuh ba kane ka dei ka sien kaba nyngkong eh ba ka Jylla kan ïoh ban pynlong ïa ka jingïalehkai siat-khnam na ka bynta ka Khelo India University Games. “Ha ka jingshisha ngim don ïa ki nongïalehkai siatkhnam napoh ka skulbah NEHU, hynrei ka dei ka jingbthah kaba wan na ka Khelo India ban pynlong ïa kane ka jingialehkai ha nongbah Shillong.”
“Hadien ba ngi la pynlong ïa ki lympung ïalehkai Inter College, ngi ju phah ïa ki kynhun ki ban leit mihkhmat sha ki lympung Inter University ha ka jingïalehkai phutbol, karate, basketball bad kriket bad kiwei. Kine ki kynhun kim shym la lah ban kynjoh sha ka thong bad dei na kane ka daw ba kim shym la ioh rung sha ka KIUG,” u la bynrap.
Ïa kane ka Khelo India University Games la pynlong haduh 16 tylli ki jait jingïalehkai ha Assam ha kaba la plie pyrda ha ka lah sngi U Blei ha Indira Gandhi Athletic Stadium (Sarusajai Stadium) kaba ha Guwahati.
Kine ki jingïalehkai ki kynthup ïa ka Athletics, Rugby, Basketball, Volley-ball, Swimming, Badmin-ton, Hockey, Fencing, Kabaddi, Football jong ki kynthei, Tennis, Malla-khamb, Judo, Table Ten-nis, Boxing ki kynthei bad ka Shooting. Katba kiwei ki jylla ka thaiñ shatei lammingi kin ïoh ban pynlong mar kawei ka jingïalehkai kata ka Arunachal Pradesh (Weight -lifting), Meghalaya (Archery), Mizoram (Foot -ball ki shynrang), Sikkim (Boxing ki shynrang), Nagaland (Wrestling) bad ka Tripura (Yagasana).
