Ha kine ki sngi, ngi la ïohi ïa ka jingleit pynïasoh jong ki katto-katne ki MDC ka seng Congress sha ka National People’s Party (NPP). Kane ka jingpynïasoh ka wan ruh tang katto-katne bnai shwa ba ka Ri kan jied ïa ki MP sha ka Lok Sabha. Tangba ngim dei ban sngewlyngngoh halor ka jingleit pynïasoh jong kine ki MDC ka Congress namar kane ka seng bad ka NPP ki ïatreilang ha ka Executive Committee ha Khasi Hills Autonomous District Council (KHADC) wat la ha Ïingdorbar Thawaiñ ki dang ïa shong la ka jong. Lehse ha ki sngi ki ban wan, kin nang don shuh sa kiwei pat ki MDC ne ki MLA ne ki nongïalam na kiwei pat ki seng saiñpyrthei ki ban ïaleit long dkhot noh ha ka seng NPP. Shisien peit ka jingïarung NPP, i kumba ka tnum bos jong kane ka seng ka la dap smam. Shano yn pynrung ïa kiba dang wan thymmai? Don kiba ong ba kat nang bun, katta nang bha. Don pat kiba sngew ba lada la ïa bun palat, ki mih sa ki kynrum-kynram. Lehse u Bah Prestone Tynsong, uba long u President ka NPP ha Meghalaya, un don ka jubab kaba biang bha namar dei ma u uba la sdang nyngkong ïa ka jingkren ban pynshong halor tnum bos ïa kiba dier por ban ïatreilang bad ka NPP.
Ngim dei ban sngewpher ïa ka jingleit rung jong ki nongïalam ne ki nongmihkhmat paidbah sha ka NPP namar ka dei ka seng kaba don ha ka bor synshar. Ngi kynmaw ba ha u snem 2013, ka NPP ka la don tang arngut ki MLA bad kita ruh kiba jop na Rilum Garo. Hynrei, 11 snem hadien, ngi sakhi ba kane ka seng ka la ïoh ban ïalam syndon ïa ka sorkar haduh arsien kynthih. Kam dei kaba kai ban ïoh ïalam kat ïa ka sorkar ha Meghalaya kaba dei ka jylla kaba ju mih bun ki kynrum-kynram bad jingpynkhyllem sorkar na ka por sha ka por. Ngi hap ban ai jingïaroh ïa u Conrad K Sangma kum u nongïalam uba la lah ban bat lut ïa kiwei pat ki nongïalam khlem da ailad ïa ka jingmih ki kynrum-kynram kiba lah ban pynkhyllem ïa ka sorkar jong u. Ka jingkiew sted jong ka NPP ha kine ki snem ka la pynkylla ïa ka jinglong jingman ka saiñ hima sima ha Meghalaya. Kane ka seng ka don ruh ki MLA ha Arunachal Pradesh, Manipur bad dei tang ma ka kaba la ïoh ïa ka kyrdan ‘National Party’ na ka thaiñ Shatei Lam Mihngi.
Hooid, ki paidbah bad kiwei pat ki seng ki don la ki jong ki jingkynthoh pyrshah ïa ka NPP. Kata kan don beit ha kano-kano ka bynta jong ka pyrthei. Ngi kynmaw ha ka por ba ka BJP ka la jop bad ïoh synshar ha u snem 2014. Tang hadien katto-katne por jong ka jingjop ka BJP, ki nongpynïasoh sha ka BJP ha Meghalaya ki la bun. Khlem jingsangeh kata ka jingpynrung dkhot. Ha Delhi bad ha kiwei pat ki bynta jong ka Ri, ka la long kumjuh. Wat ki nongïalam ba radbah ka Congress kum u Himanta Biswa Sarma, Jyotiraditya Madhav Rao Scindia, bad kiwei-kiwei ki la leit rung sha ka BJP bad ki la ïoh jingmyntoi ïalade. Ka long thik kum ha ka por ba ka Congress ka dang don ka bor ha kaba baroh-baroh ki ïa kwah lut ban ïadon bad kane ka seng. Hynrei ynda ka la duh noh ïa ka bor synshar ha u snem 2014, ngi ïohi ïa ka jingmih seng jong kiba bun ki nongïalam na kylleng sawdong ka Ri kaba la pyntlot jraiñ ïa ka Congress.
Ha kine ki sngi katba ngi nang jam sha ka ilekshon, ki lah ban don sa kiwei pat ki nongïalam kiba la paw ki ban pynïasoh sha kane ka seng. Ka daw ka long ba ka BJP ka don ha ka bor. Mano kita ki ‘riew saiñpyrthei ki bym kwah ban don ha ka bor synshar? Kiba bun ki pyrkhat ba kham suk ban ïakhun ïa ka ilekshon lada don sha ka liang jong ka seng kaba bat ïa ka jingsynshar. Lehse kata ka lah ban dei ka jingshisha. Hynrei don ruh kiba la liem ha ka ilekshon wat la ki dei ki Myntri Sorkar. Ngim nang ban batai lypa ïa ka jingmut kaba don ha ki paidbah nongthep ‘vote’. Ka long shisha kaba jwat.
Haba phai biang sha ka NPP, ngi sngewthuh ba katba ka dang don ha ka bor, yn ym don satia ki ban kwah mih noh na ka seng bad ki nongïalam na kiwei pat ki seng ruh, kin pyrshang ban ïoh don lang ha kajuh ka sem. Hynrei lada jia ba ka NPP ka duh noh ïa ka bor, kita kijuh kiba ïaknieh ban rung sha ka NPP, kin dei ki banyngkong ki ban kylla dien bad phet sa sha kawei pat ka seng kaba bat ïa ka sorkar. Baroh-baroh kiba kwah bor suda! Hynrei kumba ka long mynta, ka tnum bos jong ka NPP ka la dap. Lehse ka seng ka lah ban ïakynduh jingeh hadien habud namar ka jingbun palat ki khlieh nongïalam. Ka lah ruh ban mih ka khep ba para nongïalam kin ïaknieh tiket ha ka ilekshon. Yn ai tang ïano bad yn pynduh tang ïano? Ngin sa nang ïapeit kai ha kine ki sngi sa mano ki ban wan kiew shalor ka tnum bos jong ka NPP bad la ka NPP kan khot ne em wat lada ka tnum bos ka la dap smam.
