Ka Ranikor konstituensi kaba hap hapoh ka South West Khasi Hills District. Ka long ka konstituensi kaba don ha khap border bad ka Bangladesh. Kane ka konstituensi ka don ka jinglong ka mariang ba itynnad kaba khring ïa ki Tourist na kylleng ka ri Khasi – Jaiñtia bad na ka jylla hi baroh kawei. Lada lah ban pynbna bad pynitynnad ïa ki jaka jngoh kai kiba don hapoh u pud u sam kane ka konstituensi. Kane ka konstituensi kan sa dei kawei ka jaka jngoh kai pyrthei lada lah ban ioh skhimj pynroi bad kham pynitynnad ïa ka, ha kiba bun ki liang. Dei ban don ki iing sah miet ba biang bad ki dukan bam bad ban pynbha ïa ki surok ba la don lypa bad wat ban shna thymmai ha ki jaka ba kham donkam ban pynsuk ïa ki nongjngoh kai na kiwei ki Jylla ruh. Namar ka jingdon ka Wah Kynshi kaba heh bha ka khring ïa kiba ieit mariang ban iohi ïa ka jingjyrngam jngum ka um bad ki thwei jong ka wah kaba heh. Hapoh kane ka konstituensi ki don ki jaka jngoh kai kum ka Krem Mawtynhiang, ka pung sum shrieh. ka jingkieng Ranikor. Ka Mawkam hajan Nohlikata ka jaka leh niam ki Muslim shisien shisnem, nalor ka Pamdaba beach hajan Ranikor bad ka Sdat Wah Hilang bad Wah Kynshi beach. Lada lah ban pynpoi surok de halor u Lum ka ïawpaw ban peit na kliar jong une u Lum ka ïawpaw kaba lah ban iohi kyndiang ïa u Lum Makashang ha ka por ba shai bha ka suiñ bneng. Lah ruh ban iohi ïa ki pyntha madan ka ri Bangladesh nalor une u lum. Lah ruh ban iohi ïa ka Sor Sunamganj ka jingphyrnai ki ding Electric ha ka por mynmiet. Ka Ranikor ka dei ka Konstituensi kaba mih bha u Sohñiamtra, u kwai, u Tympew, u Lasi ne Latyrpat, Sohmrit bad kiwei kiwei. Kane ka dei ka jingpaw bad jinglong ka mariang hapoh ka Ranikor Konstituensi bad na ki them bad ki lyhuh jong ka.
C. B. Iawphniaw
