Guwahati, Rymphang:
Ki shipai jong ka tnat Border Security Force (BSF) ha ka sngi U Blei ki la lap ïa ki masi ba la thmu ban shalan ha ki bynta ka khappud Indo-Bangladesh ha Dhubri distrik kaba don ha Assam.
Ha kane ka jingpyntreikam ki shipai ki la kurup noh ïa ki 20 tylli ki masi ïa kiba la thmu ban shalan beaiñ. Ka kynhun jong ki BSF ka la ïoh ban bat noh ïa kitei ki masi ba la thmu ban shalan beaiñ ha ka por ba don ka jingpyntreikam ha ka thaiñ ba long kyndong bha hajan Salapara hadien ba ki la ïoh jingtip halor ka jingjia.
Ka kynhun shipai, ka la ong ba ïa kine ki masi la thmu ban shalan beaiñ lyngba na ki thaiñ khappud sha Bangladesh. Na kane ka jingïoh kurup ïa kine ki masi, la ngeit ba ka la long ka kam khaïi tuh jong ka kynhun ki nongkhaïi beaiñ kaba heh bad khlaiñ bha. Kumba la sakhi, la ong ba kiba bun ki masi ba la ïoh ban kurup ki dei kiba la shalan na kiba bun ki bynta jong ka Assam bad kumjuh ruh na Meghalaya, la ïathuh ki heh shipai. Ha kaba ïadei bad kane, ym pat don ba shahkem mano mano ruh.
