Mumbai, Rymphang:
Ha ka por ba ka la don ka jingïakren halor ka jingïasam ïa ki konstitwensi hapdeng ki nongïalam jong ka kynhun Maha Vikas Aghadi (MVA) ha Maharashtra, ka seng Shiv Sena (UBT)-kaba la thung ïa ki Election Coordinator ka la ong ba ka seng ka kwah ban ïakhun ha ki 18 tylli na ki 48 tylli ki Lok Sabha konstitwensi ha ka jylla. Kane ka kynthup 4 tylli na ki 6 tylli ha Mumbai na ka bynta ban ïakhun ha ka General ilekshon ka ban sa wan. Ka jingthung ïa ki Election Coordinator da ka seng Shiv Sena (UBT) ka paw ba ka long ka jingai rai jong ki halor ka jingdawa ban ïakhun ha ki 18 tylli na ki 48 tylli ki Lok Sabha konstitwensi ha Maharashtra.
Ki saw tylli ki Parliamentary konstitwensi ha Mumbai ki kynthup ïa ka Mumbai South, Mumbai South Central, Mumbai North West bad Mumbai North East. Ka kynhun jong u Uddhav Thackeray jong ka seng Shiv Sena ka la tyrwa ban iehnoh tang ïa ar tylli ki konstitwensi na ka bynta ki seng ba ki la ïatreilang na ka bynta ka jingïakhun ïa ka ilekshon Lok Sabha, ka ban sa long ha u bnai Ïaïong haduh Jymmang.
Ka jingïalang kaba khatduh jong ka kynhun MVA halor ka jingïasam ïa ki konstitwensi ka la long ha ka 2 tarik, Rymphang, ha kaba hadien kane, u Myntri Rangbah barim jong ka Maharashtra u Ashok Chavan u la mihnoh na ka seng Congress ban leit ban pynïasoh bad ka seng BJP. Kam shym la don shuh kano kano ka jingïakren hapdeng ki nongïalam jong ka kynhun MVA naduh katei ka por jong ka jingkyntiap seng jong u Chavan.
