Thiruvananthapuram:
Kumba la pynshisha ba ka sorkar kmie ka la bthah ba la dei ban buh ha ki dukan Ration da ki dur jong u Myntri Rangbahduh u Narendra Modi kumba la pynshisha ba ka la long shi bynta jong ka jingïalap ilekshon jong ka BJP. Halor kane, u Myntri Rangbah u Pinarayi Vijayan u la ong ba ka hukum jong ka sorkar kmie kan ym treikam da lei lei ruh ha Kerala.
Ka jylla kan sa khmih bniah ha kaba ïadei bad kane ka bynta bad ka Election Commission, la ong u Pinarayi ha ka dorbar jong ka jylla ha ka por ba don ka kynta kylli jingkylli.
“Ka jingpyntreikam ha kaba ïadei bad ka jingsam Ration ka la don ha Kerala la slem. Kine ki la dei ki jaka sam Ration. Ka sorkar kmie ka la sngewkhuslai bad pyrkhat halor kane tang namar ka jingïalap ilekshon. Naba ka ilekshon Lok Sabha ka la jan, ka la thmu ban pynïaid shakhmat ïa ka jingïalap ilekshon. Ngin sa pyntip ïa ka sorkar kmie ba kam dei rukom, bad ka long kaba eh ban pyntreikam ïa ka hukum. Kumjuh ruh ka sorkar kan sa khmih bniah halor kane ka bynta ban ban ïakren bad ka Election Commission,” u la ong shuh shuh.
U Myntri jong ka Food and Civil Supplies u G R Anil u la ong ba ka sorkar kmie ka la hukum ïa ka Food Department ha ka jylla ïa ka Food Corporation of India ban buh ïa ki dur jong u Myntri Rangbahduh ha palat 14,000 tylli ki dukan sam bam Ration kiba don ha Kerala, bad ban phah ïa ka kaiphot ha kaba ïadei bad kane ka bynta.
Ka la hukum ruh ba la dei ban sam ïa ki jingbam Ration ha kip la kiba don ïa ka muhor jong ka sorkar kmie.
U la ong ba kam long kaba dei ban pyndonkam bakla ïa ka rukom sam bam Ration na ka bynta ka jingïalap ilekshon.
Hashwa kane, ka jylla ka la kyntait halor ka hukum kaba la wan na ka sorkar kmie na ka bynta ban shna ïa ki ïing hapoh ka jingtreikam jong ka skhim namar ba kine ki ïing ba la shna ki dei ban doh ïa ka muhor jong ka PMAY ba la shong ha ki.
Ha Kerala, ïa ki ïing la shna hapoh ka prokram LIFE Mission, ha kaba ka sorkar jylla ka la lah ban bei da palat 80% ka jinglut.
