Lucknow, Rymphang:
Ka Mayawati, kaba long ka heh nongïalam jong ka seng Bahujan Samaj Party (BSP), ka la kyntait halor ka khubor hamsaïa kaba la ong ba kan ïatreilang bad kiwei pat ki seng hashwa ka ilekshon Lok Sabha.
“Ka khubor ba kan sa don ka jingïatreilang bad kiwei pat ki seng hashwa ka ilekshon Lok Sabha ka dei ka bym shisha. Kane ka khubor ka la paw shai ba ki la don kumba katto katne ki seng ki bym lah ban trei bha khlem da donlang ka seng BSP,” la ong ka Mayawati.
Ka seng BSP kan sa ïakhun ïa ka ilekshon Lok Sabha marwei, ka la pyntikna.
Naba ka ilekshon Lok Sabha ka la nangjan bad ba ki kynhun synrop jong ka liang pyrshah ki la nang ïapra, ka jingtrei shitom jong kiba bun ki nongïalam jong ki seng ki la kwah ban ïatreilang bad ka seng BSP hapoh ka kynhun synrop India Bloc.
U Avinash Pande, u nongpynïaid jong ka seng Congress ha Uttar Pradesh, ha ka sngi U Blei u la ong ba ka jingkhang jong ka kynhun synrop India Bloc ka la plie na ka bynta ka seng BSP ba kan ïasnohktilang na ka bynta ban wanrah ka jingïatylli ha ka ban ïakhun pyrshah ïa ka seng BJP ha ka ilekshon Lok Sabha ka ban sa wan.
Ka Mayawati ka la ong ba ka seng BSP kam shym la ïatreilang bad kino kino kiwei pat ki seng, bad ïa kane la dep ban pynbna da bun bun sien.
