Moscow, Rymphang:
Katkum ki kaiphod ba la ioh lum la ong ba ia ka met jong u nong-ialam ka liang pyrshah jong ka Russia, u Alexei Navalny, la lap na ka kamra buh metiap hadien katto katne sngi ba la ioh jingujor halor ka jingjah rngai jong u. Pynban haba la peit thuh ia ka jinglong- jingman jong ka met jong u hadien ba u la khlad, la shem ba ki don ki dak mong bad dak jngem ha ki bynta bapher bapher jong ka met. Namar kata, la ngeit skhem ba utei u nongïalam uba ïeng pyrshah ia ka jingleh jong u President ka Russia- u Vladimir Putin, lehse u la shah pynshitom jur namar katei ka jingpyrshah jong u ia ka sorkar bad ka aiñ jong ka Russia.
Namar la ong ba ia ka met jong kito ki koidi kiba khlad la ju rah beit-beit sha ka Foreign Medicine Bureau, katba ia ka met jong utei u nongialam pat la lap na ka jaka sumar bad kumta ym shym lah ban tip shai ia ka daw halor ka jingkhlad jong u ruh. Katkum ki dak mong bad dak jngem kiba don ha ka met jong u, ka pyni shai kdar ba utei u nongialam u la shah pynshitom beiñ katba u dang im bad katba u dang don ha ka kti jong ki pulit ka Russia kiba dei khmih ia ka patok kaba la set ia u. La ong ba u Navalny, u long uwei na ki nongïalam kiba pyrshah jur ia ka jingleh jong u Putin haba ïadei bad ka thma hapoh Ukraine bad u la khlad noh hapdeng ka jingshah rai ban shong patok haduh 19 snem namar katei ka jingpyrshah ia ka rai jong kiba don bor hapoh katei ka ri. Ki pulit ki la ïathuh ba u Navalny u la ïoh kem pang bad khlem tip briew shuh katba u dang mih ban ïaid kai bad kim shym lah shuh ban pynim ïa u wat la ki pyrshang shitom ban ïaleh katba lah.
Ki heh ba dei khmih ha katei ka patok ki la ïathuh ha ka kmie jong u ka Lyudmila, ba utei u nongïalam u la khlad noh namar ki jingshitom kiba wan lap kynsan bad ki bym lah ban leh eiei.
Nalor kata, la ong ba u nongïasaid aiñ jong u Navalny u la leit poi sha katei ka patok naduh ka Sngi Saitjaiñ jong ka taïew ba la dep, hynrei ki bor pynïaid kim shah wat tang ban ktah ne shim ïa ka met jong u, naba ki ong ba ym shym lah ban leh kumta tad haduh ban da dep ban pyndep lut ia baroh ki jingdonkam.
Ki nongkyrshan jong utei u nongialam, ki la pharep beit-beit ïa ki bor pynïaid ka Russia bad ong ba dei ma ki kiba shim jubor ïa ka jingim jong u Navalny. Ki bor pynïaid ka Russia kim nud ban aiti noh ïa ka met jong utei u nongïalam namar ki tieng ïoh kin lap ïa ki buit ba buhrieh na sha lyndet halor ka jingkhlad jong u.
Katba ka kurim jong u Navalny, ka Yulia Navalnaya ha ka sngi ba la leit, ka la ong ba ha kaba nyngkong kam shym lah ban ngeit ne pdiang ïa katei ka jingpynbna ba ki bor pynïaid ka Russia ki pyntip ba u kurim jong ka um don shuh.
Kumta, la ong ba ka jingïap jong utei u nongïalam ka liang pyrshah jong Russia ha kane ka por ka la wanrah ïa ka jingpynrem bad ka jingpyrshah na ba bun ba lang. Na ka liang u President ka United States u Joe Biden ruh u la ong ba dei u Putin uba hap ban shim ka jingkitkhlieh halor ka jingïap u Navalny.
