Bengaluru, Rymphang:
Ha ka por ba la mih ki jingïapher jingmut na ki jingkren jong u General Secretary jong ka seng BJP ha ka jylla u Preetham J Gowda bad u MP jong ka Hassan u Prajwal Revanna halor ka jingkwah jong ki kyrtong ka kynhun NDA na ka bynta ka Hassan bad ka Mandya Lok Sabha konstitwensi, ka jingïapher jingmut ka la mih hapdeng ki nongïalam jong ka seng BJP bad JDS ha kaba ki la kyntait ban hun halor ka jing-bhah ïa ki konstitwensi.
Ha kine khyndiat sngi ba la leit, u Preetham, uba la shah rem na ka jingïakhun ïa ka ilekshon Assembly 2023, u la kynthoh kylla halor ka jingkren jong u heh nongïalam jong ka seng JDS bad u Myntri Rangbah u HD Kumaraswamy ha kaba ïadei bad ka Hassan bad ka Mandya konstitwensi.
U Kumaraswamy, uba la don ha Hassan na ka bynta ban leit don bynta ha ka prokram niam, u la ong ba u la sngew ïa u Preetham kum u para jong u bad yn sa ïakren bad wanrah ïa ka jingïasngewthuh jingmut halor kane ka jingïapher jingmut ha kaba ïadei bad ka jingïasam ïa ki konstitwensi lada donkam.
“Ngi lah ban pynïakhun ïa u Preetham na Hassan konstitwensi lada u kwah bad don ka mon. Ki seng kiba la ïatreilang, kata ka seng BJP bad JDS ki la dei ban ïatylli na ka bynta ban ïakhun ha ka ilekshon Lok Sabha,” la ong u Kumaraswamy.
Haba la buh jingkylli, halor kane, u Preetham u la ong ba kam shym don jingkylli ei ei ha kaba ïadei bad ka jingïasngew shipara ha ki kam saiñ pyrthei bad u (HDK) u la dei ban ïakren bad la ujong u para lada u don ka jingkwah.
U Preetham u la ong ba ka seng bad ki heh nongïalam jong ka seng BJP kin sa ai ïa ka rai ha kaba ïadei bad kane la un ïakhun ne em ha ka ilekshon, bad ba um kwah ïa kano kano ka jingthrang ne ka jingai jingmut na kiwei pat.
