Guwahati, Rymphang:
Ki la don 10 ngut ki briew kiba dei ki nongtrei ha ka karkhana dewïong kiba la shah rahbor hadien ba ki la shah pynap suloi ha ka kynhun jong ki riewkiengatiar na ka par dewïong kaba don ha Changlang distrik jong ka Arunachal Pradesh.
Katkum ka jingïoh jingtip na ka jingtohkit kaba hashwa, la ong ba kine ki nongtrei jong katei ka par tih dewïong ki dei kiba na Tinsukia distrik kaba ha Assam.
Kum shi bynta ban pynshisha halor kane ka jingjia, u SP, jong ka Changlang, u Kirdi Padu u la ong: “Katkum ka jingïoh jingtip la ong ba ki la don kumba 10 ngut ki briew, ha kaba baroh ki dei na Assam kiba la shah rahbor ha ki riewkieng atiar hajan Phinboro.”
Ka Phinboro, kaba dei ka jaka kaba jngai da kumba 65 km na ka District Headquarter jong ka Changlang, ka la jngai da kumba 45 km na ka bynta ba shaphang Mihngi jong ka Margherita kaba don ha Tinsukia distrik kaba don ha Assam bad ka la long ka jaka sor kaba ïajan bha.
“Ngi la pyrshang ban wad ïa ka jingtip kaba bniah shaphang ki lanot bad ban ïoh jingtip shano ba ki don,” la ong u Padu, ha kaba u la bynrap shuh shuh da kaba ong: “Ngi la ïatreilang bad ki shipai jong ka tnat Assam Rifles bad ki pulit jong ka Assam na ka bynta ban pynlong ïa ka jingleit khynra ban lap ïa kine kiba la shah rahbor.”
Kumba la ïathuh, la ong ba kane ka jaka ka long kaba sha kyndong bad kaba dap da ki khlaw kiba rben, kane ka shim por bha na ka bynta ban wad ïa kine kiba la shah rahbor, la bynrap u Padu.
U Padu u la ong ba ïa mynta ym pat lah ban pyntikna mano ba la donkti ban rahbor ïa kine ki nongtih dewïong.
Kumba la ïathuh ka tyllong khubor la ong ba ka thaiñ Phinboro ka dei ka jaka kaba hap hapoh ka jingshah leh donbor ha ki lehnoh ka kynhun NSCN (K-YA) bad dang shen la ïoh jingtip kaba bniah shaphang u nongïalam jong ka kynhun NSCN-KYA u Makam ha kane ka thaiñ.
Kum shi bynta ban pynshai halor kane ka jingjia, u Superintendent jong ki pulit ka Tinsukia u Abhijit Gurav u la ong.
” Ïa ka jingrahbor ïa kine ki briew da ki kynhun lehnoh (ULFA/NSCN) la ïoh jingtip na Mosang Basti ka jaka kaba hap hapoh ka jingkhmih jong ki pulit ka Manmao ha Changlang distrik.”
