Thiruvananthapuram:
Uwei u lehnoh Maoist uba la 61 snem ka rta u la shahkem ha ka sngi Saitjaiñ hadien ba u la lait phet na ka kti jong ki kynhun tohkit lajan arphew snem ba la leit, la ïathuh ki pulit.
Kumba la ïathuh ka tyllong khubor, la ong ba une u lehnoh u la long trai shnong na Angadi kaba don ha Mudigere kawei na ki jaka sor kaba don ha Chikkamagaluru distrik, ïa une la tip kyrteng kum u Suresh bad ruh kum u Pradeep, une u la shah thwet jur naduh u snem 2003, hadien ba u la donkti ban leh ïa ki kam thombor jong ki lehnoh Maoist, la ïathuh shuh shuh ki pulit.
Une u lehnoh u la shahkem ha ka por ba ka la don ka jingleit khynra lehnoh ha Kanjirakolli ka thaiñ ba long khlaw jong ka Kannur kaba don ha Kerala, ha kaba u Suresh bad ka kynhun jong u ki la treikam.
“Ngi la ïoh jingtip na ki pulit jong ka Kerala ba u Suresh u la shahkem ha ki pulit jong ka Kannur District,” la ong u Jitendra Kumar Dayam, uba long u SP ha ka kynhun Anti-Naxal Force (ANF). Katkum ka jingïathuh jong ki pulit ka Kerala, la ong ba ki lehnoh Maoist ki la don bynta ha ka ban ïakhun pyrshah bad u hati khlaw ha kaba u Suresh u la mynsaw.
“Ka kynhun jong ki lehnoh Maoist ki la treikam ha Kanjirakolli Reserve Forest ha kine ki khyndiat sngi. Ha ka step jong ka 16 tarik, Rymphang, uwei u hati khlaw u la leit tur pyrshah ïa kane ka kynhun jong ki lehnoh. Une u hati khlaw u la thombor pyrshah ïa u Suresh katba kiwei pat ki la phet noh na kawei ka jaka. U Suresh um shym la ïohlad ban phet hynrei u la lynñiar bad pan jingïarap, ha kaba ki nongshong shnong kiba la ïohsngew ïa kane ki la mareh ban leit pyllait im ïa u bad ban pynkit sha Kannur Medical College. Hadien kane ki la pyntip sha ki pulit,” la ong u M Hemalatha, uba long u Superintendent of Police (SP) jong ka Kannur.
Ki pulit jong ka Kerala ki la kem noh ïa u na ka jaka ai jingsumar ha kaba u la shah sumar na ki jingmynsaw jong ka kjat bad ka shadem.
Ki pulit ki la ong, ïa u Suresh la kwah ban kem ha kiba bun ki jingjia. Ki pulit jong ka Karnataka, Kerala, bad ka Tamil Nadu ki la thwet jur na ka bynta ban ïohkem ïa u da bun bun snem.
