The Hague, Rymphang:
Ka ïingbishar ba hakhlieh duh jong ka United Nations, ha ka Sngi Nyngkong ka la sdang ia ka jing pynsngap ba shi taiew halor ka mat ba iadei bad ka jingpharep ba ka Israel ka la leit ban kam trai bad kurup ia ki bynta kiba dei jong ka Palestine.
U Myntri ka tnat kam bar ri jong ka Palestine- u Riyad al-Maliki la ong ba un long uba nyngkong ban ai jingkren bad ban pynshisha lyngba ki kot-ki sla bad ki jingthoh-jingtar kat kiba ka Palestine ka don ban pynshisha halor katei ka jingiasaid jong ki hakhmat ka International Court of Justice (ICJ) ha The Hague.
Ha u snem 2022, ka U.N.General Assembly ka la pan jingmut na katei ka ïingbishar ban ïa pyrkhat bad ïamir jingmut lang haba ïadei bad katei ka mat, ha kaba ka Palestine ka la pharep ia ka Israel ba ka la leit ban kurup bad kam trai jubor ia ki bynta jong ka.
Katba na ka liang ka Israel kam ju pynsngap ia kane baroh shi katta, namar khamtam ha kane ka por ka Israel ka la ïoh lad bha ban nang kurup syndon wat ia ka nongbah Gaza jong ka Palestine hadien ba ka kynhun lehnoh Hamas ka la leit ban thombor nyngkong ia ka Israel ha u Risaw jong u snem 2023 ba la leit.
Napdeng ki katto katne ki ri kiba la jied ban ïashim bynta ha katei ka jingpynsngap, ki kynthup ia ka United States kaba long ka paralok ba hajan eh jong ka Israel, ka China, Russia, South Africa bad ka Egypt. Hynrei la ong ba ka Israel kan ym leit ban ïadon bynta ha katei ka jingpynsngap watla katei ka mat ka long kaba kongsan na ka bynta jong ka.
