Ka rai jong ka Supreme Court ban ñiew biang ïa ki ‘vote’ dalade ha ka ilekshon ban jied ‘Mayor’ jong ka Chandigarh Municipal Corporation bad ka jingrai jop ïa u kyrtong uba la shah rai rem ha u Returning Officer (RO) lane u nongpynïaid ïa ka ilekshon, ka la long ka jingkyrmen na ka bynta ka jingpynneh ïa ka jingsynshar paidbah ha ka Ri. Kaei kaba la jia ha kane ka ilekshon ban jied ‘Mayor’ ka dei ban pynplied ïa ki khmat bad ki shkor ki jong ngi kiba ym ju shimkhia ïa ki mat kiba ïadei bad ka jingsynshar paidbah.
Ka jingrai jop jong u Returning Officer (RO) ïa u kyrtong ka BJP hadien ba ma u (RO) hi u la lushia ïa ki kot thep ‘vote’ hapdeng ka jingsakhi jong kiba bun na ka daw jong ka jingïoh ring dur da ka kor CCTV ha ka por ba u dang leh kumne, ka la pyni ba kumno ïa ka hok jong kiba bun lah ban ïuhroit tang da uwei u briew uba la ïoh ïa ka jingshaniah ban pynïaid ïa ka ilekshon. Haduh katto u nud ban pynkylla ïa ka mon jong kiba bun da kaba pyndonkam tang da u khulom! Bad kane ka long kaba paw haba shit haba shai, bad ïoh lehse ki don kiba kum kine sha kiwei pat ki bynta jong ka Ri, hynrei ki bym pat paw paidbah?
Ngi dang long kiba donbok ba ka Supreme Court ka la mih shakhmat ban shimkhia ïa ka mukotduma kaba ïadei bad ka rukom pynïaid ïa katei ka ilekshon. Ka long ruh ka jingkyrmen ba ka Supreme Court, ym tang ba ka la pynkylla ïa katei ka ilekshon ha kata ka rukom ba ka hok bad jingshisha kin synshar, hynrei ka la pyntieng pynsmiej ruh ïa kiwei pat kiba don kajuh ka jingthmu kum utei u nongpynïaid ilekshon. Kiba kum kine ki nongpynïaid ilekshon ki buh jingma ïa ka Ri bad ïa ka jingsynshar paidbah.
Donbok ba ka Supreme Court bad ki nongbishar jong ka ki la pynkylla da kaba rai ba u kyrtong ka Aam Aadmi Party (AAP) u dei uba don ka hok ban jop ïa katei ka ilekshon ‘Mayor’. Hynrei ngim tip pat kaei ka ban jia lada ym shym la ïoh ring da ka kor CCTV ïa utei u nongpynïaid ilekshon katba u dang pruid ïa kito ki kot thep ‘vote’ khnang ban pynkylla ïa ki kum kita ki ‘vote’ ki bym ïaid khnang ba kan pynlong ïa u kyrtong ka AAP ban wan ha ka kyrdan kaba ar bad u kyrtong ka BJP ha ka kyrdan banyngkong.
Ngim tip haduh katno ki nongshong shnong ka Meghalaya ki la buddien ïa kane ka khubor kaba long ka bakongsan bha ha ka jingsynshar paidbah. Hangne ha jylla jong ngi, ngi don bun ki ilekshon – MP, MLA, MDC lem bad ki khlieh nongsynshar ha ki Hima/Raid/Shnong bad kiwei. Aïu kan jia lada ka rukom pynïaid ïa ka ilekshon ka ïasyriem bad katei kaba la jia ha Chandigarh? Kaei kaba la jia ha kiwei pat ki bynta jong ka Ri ka lah ban wan jia lang ha ka jylla bad ki shnong ki thaw jong ngi ruh. Ngim dei ban kheiñ sting bad ngin hap ban long kiba peitngor khnang ba ngin lah ban ri kyndong ïa ka jinglong laitluid bad khamtam eh ïa ka rukom synshar paidbah ha kaba ka mon jong uba bun ba lang ka dei ban ïeng rasong. Lada shukor noh ïa ka rai jong uba bun, sa tang katno yn ym don shuh ki ban shañiah ha ki ilekshon bad ha ka rukom synshar paidbah bad synshar laitluid.
Kaei kaba la jia ha Chandigarh ka pynlong ruh ïa kiba bun ban pyrkhat sniew shaphang kiwei pat ki ilekshon. Hato kiba la shah kheiñ kum ki nongjop ki da jop shisha katkum ka hok lane la shu pynkylla jubor bad pynjop jubor? Ban ïa phaidien halor kane, ka long kaba jwat namar donkam ruh ïa ki sabut kiba biang. Ym lah ban shu kynnoh khem da don ki jingshisha. Hynrei kaei kaba ngi hap ban leh nangne shakhmat bad da kaba shim jinghikai na kaei kaba la jia ha ka ilekshon ‘Mayor’ ha Chandigarh ka long ba ngim dei ban shu shañiah kat ïa kiba don ha ka liang ka rukom pynïaid ilekshon. Ngi dei ban long kiba husiar bha nalade lym kumta ka rai jong ngi ka lah ban sepei.
Namarkata, ngi kyntu ïa ki paidbah ba kin da peit bniah ïa kaei kaba ka Supreme Court ka la shem ha kaba ïadei bad ka ilekshon ‘Mayor’ ha Chandigarh. Puson bha naduh ba sdang haduh kaba kut. Lada leh kumta, ki paidbah kin sa sngewthuh kham bha bad kan long ruh kum ka jinghikai ïa ki. Ngi dei ban ïa pynleit jingmut ha kiba kum kine ki mat ki jura bad ki jingjia khnang ba kan long kum ka jingsneng lang ïa baroh. Ka dor kaba ngi hap ban siew na ka bynta jong ka jing long laitluid ka dei ka jinghusiar bad ka jingpeitngor kaba khlem sangeh.
