Shillong, Rymphang 20
Ïa ka lympung ïalehkai ïakob siatkhnam na ka bynta ka Khelo India University Games la sdang ha ka Sngi Ba-ar ha SAI Training Centre, Shillong kaba la wan ïashim bynta da 32 tylli ki skulbah kiba na kylleng jong ka ri India.
Ïa kane ka lympung la plie da u Myntri ka tnat ïalehkai ka Sorkar Jylla u Bah Shakliar Warjri ha ryngkat ka jingïadon lang ka Deputy Commissioner ka East Khasi Hills District ka Kong R.M Kurbah, kumjuh u Acting Registrar ka NEHU u D.K Niak, u Dr. L.R. Bishnoi (IPS) Director General of Police ka Jylla, u Working President ka Meghalaya State Olympic Association Bah John F. Kharshiing, u Director ka Sports Department ka NEHU u Prof. L. Kma bad kiwei.
Kane kan dei ka sien kaba nyngkong eh ba ïa kane ka jingïalehkai la lah ban wanrah ha kane ka nongbah. Ha kawei ka liang kaba sngewsih pat ka long ba ka Jylla kam shym la lah ban sei wat tang iwei ruh na ki nongïalehkai ki ban ïashim bynta ha kane ka lympung. Ka daw kaba pynlong ïa kane ka dei namar bym shim khia ka skulbah jong ka North Eastern Hill University (NEHU) bad kam ju don ka prokram ai jinghikai ba pura hashwa ba kan phah ïa ki nongïalehkai ban leit ïashim bynta ha ki lympung ïalehkai Inter University kiba la ju pynlong manla u snem ha kylleng jong ka ri India.
Ban ïoh rung sha ka Khelo India University Games, ki skulbah ki dei ban ïoh rung shaduh ka thup kaba phra (top 8) ha ka All India Inter University, hynrei ka Jylla kam shym la ïoh rung sha katei ka lympung namar ka skulbah NEHU kam shym la lah ban ai jinghikai pura ïa ki kynhun hashwa ba kin leit ïashim bynta shabar jylla.
Haba ai jingkren ha kane ka sngi u Bah Sha-kliar u la pdiang sngewbha ïa ki nongïalehkai kiba la wan na kylleng ki skulbah jong ka ri ban ïashim bynta ha kane ka jingïaleh -kai siatkhnam. “Kane ka jingwan ka jong phi sha kane ka Jylla ka long ban sakhi da la ki jong ki khmat ïa ka jingitynnad kane ka jaka. Te kumta ngi pdiang sngewbha ïa phi baroh sha kane ka lympung.”
“Ngi na ka liang ka Sorkar Jylla ngi ïatrei lang bad ka Sorkar Pdeng na ka bynta ban kyntiew ïa ki jingïalehkai bapher bapher. Kumba ngi tip ba ka jingthmu jong ka Sorkar Jylla ka long ban kyntiew ïa ki jingïalehkai ha ki kyrdan bapher bapher ha ka ri hi baroh kawei. Te kumta ka jingpynlong da ka sorkar Pdeng ïa ka Khelo India ka long ban kyntiew ïa ki samla ïalehkai ha kylleng jong ka ri.”
Ha kawei pat ka liang u Director ka Sports Department jong ka skulbah NEHU, u Prof. L. Kma haba ïakren bad ki nongthoh khubor hadien ba la wai ka jingïalang plie, u la ïathuh ba ïa ka jingïalehkai siatkhnam ym pat ju pynlong da kane ka skulbah ha ki snem kiba la leit. U la ong ba ka NEHU kam don ïa ki tiar ki tar kiba biang nalor ba ki long kiba rem dor, kam don ïa ka mang pisa kaba heh ha ki kam ïalehkai, kam don ïa ki Coach bad ym ithuh ithaw ïa ka rukom pynïaid ïa kane ka jait jingïalehkai.
Hynrei haba wan ïashim bynta da ki skulbah na kylleng jong ka ri, u Director u la ong ba long kaba sngewbynnud haba ym ïoh ban sei ïa ki nongïalehkai ha kane ka lympung bad u la kubur ba ka por ka la dei ban pynlong ïa kum kane ka jait jingïalehkai ha ki snem ki ban wan.
Ïa kane ka lympung la pynlong haduh 16 tylli ki jait jingïalehkai ha Assam kiba kynthup ïa ka Athle-tics, Rugby, Basketball, Volleyball, Swimming, Badminton, Hockey, Fen-cing, Kabaddi, Football jong ki kynthei, Tennis, Mallakhamb, Judo, Table Tennis, Boxing ki kynthei bad ka Shooting. Katba kiwei ki jylla ka thaiñ shatei lammingi ki la ioh ban pynlong mar kawei ka jingialehkai kiba kynthup ia ka Arunachal Pradesh (Weightlifting), Meghalaya (Archery), Mizoram (Foot -ball ki shynrang), Sikkim (Boxing ki shynrang), Nagaland (Wrestling) bad ka Tripura (Yagasana).
