Shillong, Rymphang 20
Ka Lawsohtun SC ka la ïoh jingjop ha ka lympung ïalehkai First Division Football League ba la pynïaid da ka Shillong Sports Association. Kane ka la wan urlong hadien ba ka la lah ban pynliem noh ïa ka Umphyrnai SC da 4-2 kol ha ka sngi Ba-ar.
Kane ka nam jop ka la wan urlong lyngba u Joinbor Nongspung bad u Rangdajied Rynjah kiba la ïoh ban thep mar ar kol na ka bynta ban pynlong ïa katei ka kynhun ban khur ïa ki lai point.
Haba phai sha kane ka jingïalehkai kaba long ha SSA Stadium Polo, ka Lawsohtun ka la ïoh ban pynkhih jar nyngkong eh lyngbha u Joinbor ha ka minit kaba 9. Hynrei tang hadien shiteng kynta ka Umphyrnai ka la lah ban pynphai kylla lyngba u Ridingstar Kharkongor ha ka minit kaba 37 na ka bynta ban ïakhaid haduh kaba kut jong ka kylla step.
Hadien katto katne por ba la bteng ïa ka jingïakhun jong ka kylla miet, ka Lawsohtun ka la thep biang ïa ka kol kaba ar lyngba u Rangdajied ha ka minit kab 65. Hadien shi minit u Joinbor u la ïoh ban pynbud ïa ka kol kaba ar ka jong u na ka bynta ban pynlong ïa ka Lawsohtun ban tam da 3-1 kol.
Ka Umphyrnai ka la ïai bteng ban ïakhun tyngeh ha kaba ka la ïoh ban thep ïa ka kol kaba ar ha ka minit kaba 77 lyngba u Damanglang Kharbangar. Hadien ar minit u Rangdajied u la ïoh ban thep biang ïa ka kol kaba ar ka jong u na ka bynta ban pynlong ïa ka Lawsohtun ban khur syndon ïa ka jingjop.
Ka jingïalehkai ha ka sngi Balang kan long hapdeng ka Malki SC pyrshah ïa ka Mylliem SC haka por 2:45 janmiet.
