Beijing, Rymphang:
Ka China ha ka Sngi Nyngkong ka la pynbna ba ka la mynjur ban pyllait noh ia ka jingkhang haba iadei bad ka jingshalan ia ka doh masi na Spain hadien ba la ioh ban shong jingialang da ki Myntri kam bar ri jong kitei ki arliang ri kaba la long ha ka Sngi U Blei.
Namar kumba la tip hi ba ka China naduh u snem 2000, ka la wanrah ia ka aiñ ban khang noh ia ka jingshalan doh masi na Spain namar ki jingpang bad jingshitom jong ki masi hapoh Spain naduh kitei ki snem bad kaba ka China ka shem ba ka long kaba ap jingma lada kan pyniaid bad shalan ia kitei ki masi kiba don ia kitei ki jait jingpang ba khyllah ha kitei ki snem.
Kumta, la ong ba kane ka khubor ha kane ka por, ka long ka khubor kaba bha bad ka ban kyntiew ia ka jingiadei bad ka ioh- ka kot jong kitei ki arliang ri khamtam ia ki nongrep bad nongri jingri jong ka Spain.
Katei ka jingpynbna na ka China, ka long ruh ha kum kane ka por ba dang ha kine ki 2 taiew ba la lah, ki nongrep bad nongri jingri jong ka Spain ki la mih ban ïakhih ha ka jingiakhih ba heh jogn ka EU namar ban pyrshah ia ka jingpyntreikam ia ki kyndon kiba khia bad kiba ktah jur ia ka khaïi- pateng jongki bad kaba la buh jingma ia ka kamai bad ka kam lajong ba ki ju trei baroh shi katta.
Utei u Myntri kam bar ri ka China ha ka Sngi Saitjaiñ u dang dep kren ruh shaphang ka jingiakhun thma hapdeng ka Israel bad ki lehnoh Hamas, ha kaba u la dawa ia ka Israel ba ka dei ban sangeh noh shi syndon ia ka thma hapoh Gaza khnang ban ioh ban phah noh ia ki lad jingiarap bad ban pynbit pynbiang ia ki jingdonkam jong ki paid nongshong shnong ka Gaza.
