Ahmedabad, Rymphang:
Ka sorkar Gujarat ka la ïathuh hapoh ïingdorbar ha ka Lah Sngi U Blei ba ha kine 2 snem ba la leit ka la pynlut da kumba T. 58 klur ka pisa ha kaba ïadei bad ki rukom pynbit pynbiang ïa ki jingdonkam, kiba kynthup halor ki jingshim wai, ki umphniang bad halor ki jingdonkam ban pyntreikam ïa ki liengsuiñ thma bad ki Helicopter.
U MLA jong ka seng Congress u Arvind Ladani na Manavdar u la buh jingkylli ha kaba ïadei bad ka jinglut jong ka sorkar Gujarat ha kaba ïadei bad ki jingpynbit pynbiang halor baroh ki jingdonkam ha kaba ïadei bad ki jingpyntreikam ïa ki liengsuiñ ha ki 2 snem ba la leit.
Ka sorkar ka la phah jubab ha kaba ka la batai ba ka jinglut kaba long T. 34,26,65,295 ka la long na ka bynta ki jingpynbit pynbiang baroh, kata ha ka jingshim wai, ka umphniang, halor ki Pilot, bad kiwei pat ki nongtrei kiba donkam hapoh ki liengsuiñ bad ki Helicopter naduh ka 1 tarik, Kyllalyngkot, 2021, haduh ka 31 tarik, Nohprah, 2022.
Shuh shuh T. 24,24,55,209 la pynlut naduh ka 1 tarik, Kyllalyngkot jong u snem 2022, haduh ka 31 tarik, Nohprah, 2023, ha kaba lada kheiñlang baroh ka la long T. 58,51,20,504 ka jingpynlut ha kine ki ar snem ba la leit.
