Srinagar, Rymphang:
Ki pulit jong ka Jammu & Kashmir ha ka Lah Sngi U Blei ki la pynpulom noh ïa ka jingpyntreikam jong ka kynhun khaïi briew da kaba ïoh kem ïa saw ngut ki runar.
Ki pulit ki la ong ba ha ka 14 tarik, Rymphang, ki la ïoh ïa ka Call na kawei ka briew ka bym dei na katei ka thaiñ ha kaba kam shym ithuh lynti haba ka don ha ka thaiñ Arath kaba don ha Budgam distrik jong ka Jammu & Kashmir distrik, kaba la pan jingïarap.
Kumba la ïathuh, la ong ba ka kynhun jong ki pulit na ka jaka treikam kaba na Soibugh ka la mih bad leit sha katei ka jaka ban leit pyllait bad ai jingïarap ïa kane ka birew ha kaba ha kajuh ka por la aiti noh ïa ka sha ka ‘Sakhi One stop centre Budgam’.
Ki pulit ki la ong ba haba la tohkit bniah na katei ka briew, ka la ïathuh ba ka la shu shah ïalam sha Kashmir ha kawei ka briew ba la tip kyrteng kum ka Zaitoon Bibi, kaba dei ka nongshong shnong jong ka Kolkata, West Bengal bad u Bashir Ahmed Mochi jong ka Arath, Budgam.
U Bashir u la die ïa kane ka briew sha u Parvaiz Ahmad Ganiee jong ka Yall Pattan ha ka dor T. 1,35,000 bad ka la shah pynbor ba ka la dei ban ïathoh bad u.
Shuh shuh la ïathuh ba ki pulit jong ka Budgam ki la buh da ka jingmudui ha kaba ïadei bad kane ka jingjia katkum ki kyndon ba la buh ha ka jaka treikam jong ki pulit ka Budgam bad ka jingtohkit ha kaba ïadei bad kane ka jingjia ka la ïaid shakhmat.
Ha ka por ba la don ka jingtohkit, ki la don saw ngut ki briew kiba kynthup ïa u Bashir Ahmad Mochi, Ghulam Hassan Najar jong ka Arath Budgam, Parvaiz Ganiee bad u Mohammad Ramzan Ganiee jong ka Hanjibugh Magam kiba la shah pynngat ha ki kyndon aiñ naba la lap ba ki la donkti ha ka kam khaïi briew bad ha kajuh ka por la kem noh ïa ki ha kaba ïadei bad ka jingjia, la ïathuh ki pulit ha kaba ki la bynrap shuh shuh da kaba ong, ba ka jingtohkit ha kaba ïadei bad ka jingjia ka dang ïaid shakhmat.
Hashwa kane, kawei ka briew kaba dei na Bihar kaba la long ka lanot ha ka jingshah die ka la shah pyllait noh ha ki pulit ha Bandipora distrik ha Jammu & Kashmir.
Ki pulit ki la ïathuh shuh shuh ba kane ka briew ka la shah die sha u briew ba la tip kyrteng kum u Zahoor Ahmad Sheikh, uba long u nongshong shnong jong ka Banyari Ajas Bandipora.
