Shillong, Rymphang 20
Ka Nagaland ka la lah ban pynliem noh ïa ka Meghalaya da 7 wiket na ka bynta ban long ka lahduh ha ka lympung ïalehkai U-23 men’s Col CK Nayudu Trophy (Plate Group) ha ka Lah Sngi U Blei ha Sovima, Nagaland.
Kane ka jingïalehkai final ka la sdang naduh hynnin ka sngi bad ka Meghalaya ka la shah pynkhyllem baroh ki nongtied bad ban kamai 108 run, katba ka Nagaland ka la lah ban pynkut ïa ka sngi da kaba kynjoh 50/1.
Haduh hynne ka sngi sngi haduh 22 wiket ki la shah pynhap, hynrei ka Nagaland kaba la shah pynhap baroh ki nongtied, ka la lah ban kamai 109, katba ka Meghalaya ka la lah ban kamai 53 run ha ka inning kaba ar, ha kaba ka la pynlong ïa ka Naga-land ban jam shakhmat bad shah pynhap lai wiket.
U Mughavi Sumi u la long u nongtied uba kynsai jong ka Nagaland ha kaba u la lah ban kamai 62 run (not out) ha ka inning kaba nyngkong. U Manish Sharma u la alh ban khur san wiket (5/22 ha ki 16 over) na ka bynta ka Meghalaya katba u Bipin Kumar Ray u la khur 2/33 ha ki 8.5 over. U Abhishek Kumar um shym la lah shuh ban khur wiket bad hynnin ka sngi u la ïoh 1/43 ha ki 9 over.
Ki ar ngut ki nongtied ka Meghalaya kata u Mrityunjay Bharali bad u Bipin, ki la lah ban kamai mar 11 run. U Neizekho u la khur hynriew wiket (6/15), katba u Hem u la khur 4/24.
Wat la ka Meghalaya ka la pyrshang ban ïaleh-kai bha na ka bynta ban kynjoh sha ka thong, hynrei kam shym la lah ban pynurlong hadien ka la shah pynhap lai ngut ki nongtied bad mad ïa ka jingshah rem.
Ha kane ka sngi u President ka Meghalaya Cricket Association u Nababrata Bhattacharjee u la sam ïa ka trophy nam lahduh sha ka Nagaland. Te kumta ka Nagaland bad ka Meghalaya kiba la ïoh rung sha ka final, ki la jam mynta ssha ka Elite Group na ka bynta ka aïom ka ban wan.
“Nga ai khublei ïa ka Nagaland Cricket Association kaba la long ka lahduh ha ka lympung ïalehkai U-23 Plate Group jong ka BCCI da kaba ka la lah ban pynliem ïa ka Meghalaya Cricket Association ha ka jingïakhun final kaba la long ha Sovima,” la pynpaw u Bhattacharjee.
Hapoh kane ka NECDC (North East Cricket Development Committee) ki don haduh hynriew ki jylla kata ka Arunachal Pradesh, Manipur, Meghalaya, Mizoram, Nagaland bad ka Sikkim kiba la ïoh long dkhot hapoh ka BCCI bad u Bhattacharjee u la long kum u Convener ka NECDC.
