Shillong, Rymphang 20
Ka Hyderabad ka la lah ban pynliem noh ïa ka Meghalaya da 5 wiket na ka bynta ban rah ïa ka nam lahduh ha ka lympung ïalehkai Ranji Trophy (Plate Group) ha ka Sngi Ba-ar ha Rajiv Gandhi International Cricket Stadium kaba ha Hyderabad.
Kane ka long ka sien kaba nyngkong eh naduh ba ka Jylla ka la pynkut noh ïa ka jingpynrung ïa ki rangïalehkai nabar jylla (guest player) na ka bynta ban plie lad tang da ki rangïalehkai napoh ka Jylla. Namar kata, ka la lah shisha ban jam shaduh ka final bad kaba la lah ban ïalehkai bha naduh kaba sdang jong kane ka lympung.
Haba bteng hynne ka step na ki 71/1 ha kaba ka la donkam 127 ban khur ïa ka jingjop, ka Hydera-bad ka la shah pynhap sa saw wiket, hynrei ka la lah ban pynurlong ïa ka jingjop lyngba u Chandan Sahani.
Wat la ki nongkawang bol ka Meghalaya ki la lah ban ïalehkai bha na ka bynta ban khanglad ïa ka liang pyrshah ban kamai run, hynrei u rangïalehkai Indian Premier League jong ka Hyderabad u Tilak Varma u la lah ban kamai 64 run na ki 50 bol na ka bynta ban pynurlong ïa kane ka kynhun ban khur ïa ka jingjop. Une u nongtied ba kynsai u la shah pynkhyllem noh ha u Raj Biswa (1/49), bad u Chengkam Sangma (3/47) u la lah ban pynhap wiket, katba u Aryan Borah (1/13) u la khur shi wiket.
“Ka MCA ka sngewsa -rong ïa kane ka kynhun ïalehkai kaba la lah ban ïalehkai bha ha kane ka aïom,” la pynpaw u Secretary ka Meghalaya Cricket Association u Bah Gideon Kharkongor. “Kane ka long ka jingïalehkai bha ka kynhun naduh u snem 2018, kaba long ka snem ba ka la pynïasoh sha ka BCCI.”
Ha kane ka aïom ka Meghalaya ka la ïakynduh ïa ki jingeh kiba bun, ha kaba ka la jop lai sien bad shah rem ar sien, hynrei ka la lah ban jamshaduh ka semi final.
Lyngba ka jinglah ban ïoh rung sha ka final, ka Hyderabad bad ka Meghalaya ki la ïoh rung sha ka Elite Groups jong ka Ranji Trophy ha ka aïom ka ban wan.
“Ki rangïalehkai ki la lah ban pynpaw ïa ka jingtbit bad ïa kane la pynpaw da ki dkhot ka technical jong ka BCCI. Watla ki la lah ban ïalehkai bha, hynrei kin hap ban trei shitom haduh 200 na ka shispah ha ka aïom ka ban wan na ka bynta ka Elite Group. Ki rangïalehkai jong ngi ki la sngewthuh ïa ka jingdawa ha ka met ka phad, ka bor pyrkhat na ka bynta ban pynkhreh ïalade ïa ki jingïalehkai,” la bynrap u Bah Kharkongor.
Ka jingai khublei ïa kane ka kynhun ka la wan ruh lyngba u President bad Secretary jong ka Hydera-bad Cricket Asso-ciation lem bad ki dkhot ka North East Cricket Development Committee (NECDC).
Napdeng ki rangïalehkai kia la lah ban ïalehkai bha mynta u snem, u nongïalam ka kynhun u Kishan Lyngdoh, uba la lah ban kamai 695 run ha ki hynñiew sien ïakhun, u la lah ban kamai ïa ki ar spah run na ka bynta ka Meghalaya. Uwei pat u rangïalehkai u dei u Raj Biswa, uba la lah ban khyrwit ïa ki ar spah run bad ban kamai 441 run, katba u Jaskirat Singh Sachdeva u la lah ban kamai 422 run kynthup ïa ki lai tylli ki jinglah ban kamai ïa ka shiteng spah.
Napdeng ki nongka-wang bol, u Akash Kumar Choudhury uba la duh ïalehkai ha ki ar tylli ki jingïakhun, u la wanphai sha ka jingïakhun na ka bynta ban khur haduh 34 wiket ha ki san sien ïakhun bad mynta u la don ha ka thup kaba shiphew hapoh ka ri. Kumjuh u Aryan Borah, uba la ah ban khur shi wiket pyrshah ïa ka Hyderabad, u la lah ban khur 23 wiket, bad u Dippu Sangma, u la khur 17 wiket ha kane ka lympung.
