New Delhi, Rymphang:
Ka Criminal Investigation Department (CID) jong ki pulit ka Assam ka la thmu ban phah ïa ki shithi khot hajir sha u nongïalam jong ka seng Congress u Rahul Gandhi ha kaba ïadei bad ka jingshah kynnoh donkti jong u ha ka jingïakynad kaba la jia ha ka por ba dang rung ka ‘Bharat Jodo Nyay Yatra’ ba la ïalam da u Rahul Gandhi ha Guwahati ha u bnai ba la dep, la ïathuh ka tyllong khubor.
Ka la don ka jingujor ejahar ha kaba ka la pynmih ruh ïa ka kyrteng jong u Rahul Gandhi ryngkat ki heh nongïalam jong ka seng Congress kum u KC Venugopal, Jitendra Singh, Jairam Ramesh, Srinivas BV, Kanhaiyya Kumar, Gaurav Gogoi, Bhupen Kumar Borah, bad Debabrata Saikia.
Ha ka Lah Sngi U Blei, ki pulit jong ka Assam ki la phah da ki shithi khot hajir sha u MLA jong ka seng Congress u Jakir Hussain Sikdar bad sha uwei pat u nongïalam jong ka seng na ka bynta ban tohkit bniah na ki ha kaba ïadei bad ka jingshah kynnoh donkti ha katei ka jingjia.
Ïa ka jingkhot hajir la phah ruh sha u General Secretary jong ka Guwahati City Congress u Ramen Kumar Sarma, ha kaba ki la shah bthah ba ki la dei ban leit mih hakhmat ki pulit ha ka por 11.30 mynstep ha ka 23 tarik, Rymphang.
Ha ka 23 tarik, Kyllalyngkot, ki nongbud jong ka seng Congress ha ryngkat ka jingdonlang jong u Gandhi bad kiwei pat ki nongïalam jong ka seng ki la ïaleh pyrshah ban kiew bad pynkhyllem ïa ki jingker ba la buh da ki pulit. ïa kane la buh hadien ba u Myntri Rangbah jong ka jylla u Himanta Biswa Sarma u la byrngem ban ujor da ka ejahar lada jia ba ka Yatra ka pyrshang ban rung ha ka jaka pdeng jong ka nongbah Guwahati.
Hadien kane ka la paw ba kane ka jingleh jong ki nongbud jong kane ka seng ka long kaba beaiñ naba ki la ïaleh pyrshah ïa ki kyndon ba la buh da ka sorkar kaba la khang pyrshah ba kin pynlong ïa ka Yatra ha ki jaka pdeng jong ka nongbah.
Ki nongbud jong ka seng Congress ki la ïakynad bad ki pulit, ha kaba ki pulit ki la hap ban pyndonkam da ki lathi khnang ban tehlakam ïa ka jingtur jong ki nongïaleh pyrshah, hynrei kim shym la lah ban khanglad ïa ki briew na ka jingpynpra bad kiew najrong jong ki jingker ba la buh da ki pulit.
Kiba bun na ki pulit bad ki nongbud jong ka seng ki la ïamynsaw ha ka por ba la don ka jingïapynibor kaba markylliang.
