Shillong, Rymphang 21
Ka Malki SC ka la pynliem noh ïa ka Young Guns CC da 137 run na ka bynta ban khur ïa ka jingjop ha ka lympung ïalehkai First Division Shillong Cricket League ha ka sngi Balang ha madan Polo.
Ha kane ka jingïakhun, ka Malki SC ka la kam trai ban tied nyngkong ha kaba ka la kamai 268 run bad shah pynhap 3 wiket ha ki 40.0 over. U Ronnie M. Nongbri u la ïoh ban khyrwit ïa ka spah run (114 na ki 116 bol) bad u Sylvester Mylliempdah u la ïoh ïa ka shiteng spah run (57 run na ki 54 bol). Katba u Ankit Tamang u la khur 2 wiket bad ïa ka shi wiket la khur da u Mickey Lyngdoh.
Haba wan beh ïa ka thong, ka Young Guns ka la kamai tang 131 run hadien ba ka la shah pynhap 10 wiket ha ki 32.1 over. U Aditya Singh u la tied 40 run na ki 48 bol bad u Rudra S. Rathor u la tied 23 run na ki 31 bol. Katba u Mickey Marngar u la khur 5 wiket bad ïa ki 3 wiket la khur da u Nick Dann. Ïa ka nam Player of the Match la ïoh da u Ronnie Nongbri.
