Seoul, Rymphang:
Katkum ki khubor la ong ba u nongialam jong ka North Korea- u Kim Jong Un u la ioh pdiang ia ka jingai sngewbha na u President ka Russia- u Vladimir Putin da kawei ka kali kaba kordor bad kaba la shna kyrpang da ka Russia na ka bynta ba un ioh ban pyndonkam ialade shimet ha ka leit ka wan.
Namar la ong ba kine artylli ki ri ki la sdang ban iajan bad iadei bha naduh ka jing-ialang bad ka jing-iakynduh hapdeng u Kim bad u Putin ha u Nailur mynshem snem bad hadien ba kitei ki nongialam ki la ia kular ban iatrei lang bad ban kyntiew ia ka jinglong- jingman hapdeng kitei ki ri ha kine ki sngi ban wan.
Ia katei ka kali ba la shna bad pynmih hi da ka Russia, la aiti bad phah sha ki nongbud ba jan eh jong u Kim ha ka 18 tarik u Rymphang.
Na ka liang ka para jong u Kim ka la pynpaw ia ka jingsngewi eid bad jingsngewjan kaba jur haba iadei bad katei ka jingai sngewbha na u Putin bad ka la kyntu ia u Kim ba u dei ban ai khublei kyrpang ia katei ka jingai sngewbha jong u Putin namar kane ka pyni shai ia ka jingiadei kaba kyrpang bad kaba skhem hapdeng kitei ki nongialam ba hakhlieh duh ka Russia bad ka North Korea.
Wat la katta, la ong ba ym shym la pynshai pat ha kano ka dur la pynpoi ia katei ka kali na Russia sha North Korea. La ong ruh ba u Kim u don shibun tylli ki kali rem dor bad katei ka kali kaba u Putin u ai sngewbha ha kane ka por ruh ka long kawei na ki kali ba rem dor tam jong ka Russia.
