Brussels, Rymphang:
Ki ri kiba don hapoh jong ka European Union (EU) lait noh ka Hungary, ki la iasoh ban ai jingkyrshan halor ka jingkhot ban phah sangeh noh ia ka thma hapoh Gaza na ka bynta ban ioh pynpoi ia ki lad jingiarap sha ki paid nongshong shnong ba lui-lui ka Gaza kiba la kynduh jingeh bad shong khlem bam, khlem dawai naduh ba sdang ka thma jong ka Israel pyrshah ia ki lehnoh Hamas kiba don hapoh ka nongbah Gaza.
Namar la ong ba ka European Union ka la leh shitom ban wanrah ia ka jingdawa kaba jam halor ka jingleit hiar thma jong ka Israel sha Gaza, ba ka Israel ka dei ban sangeh noh shi syndon ia katei ka thma khnang ba ki tnat bad ki ri bapher bapher kin ioh ban phah ia ki jingdonkam bad ki lad jing-iarap sha ki paid nongshong shnong ka Gaza kiba la shong tyrkhong bad kylla kum ki phetwir hapoh katei ka nongbah naduh ba la sdang ka thma haduh kane ka kynti.
Kumta, la ong ba baroh kitei ki ri kiba kynthup hapoh jong ka European Union lait noh tang ka Hungary, ki la pynpaw ia ka jingsngew khia kaba jur halor ka jinglong-jingman jong ki paidbah hapoh Gaza. Bad namarkata, ki la dawa ia ka Israel ba ka dei ban sangeh noh shi syndon khnang ba kin ioh ban pynbit pynbiang na ka bynta ki jingdonkam jong ki paidbah ka Gaza.
Namar la ong ba ka Hungary pat ka long ka nongkyrshan ba radbah jong ka Israel bad kaba la ai jingkyrshan ia katei ka ri ha ka jingleit hiar thma pyrshah ia ki lehnoh Hamas kiba synshar hi ia ka nongbah Gaza baroh shi katta. Kumta ruh la ong ba ka Hungary kam shym treh ban ia mynjur lang bad kitei kiwei pat ki ri kiba long hi ki dkhot jong ka European Union.
