Shillong, Rymphang 21
U MLA jong ka Mawlai constituency u Bah Brightstarwell Marbaniang u la ong ba ki ‘rang ïalehkai Santosh Trophy kiba la ïadon bynta ban pynurlong ïa ka Jylla ban wan ha ka kyrdan ba-ar ha u snem ba dep, ki long kiba dei hok ban ïoh ïa ka bai bam (scholarship).
Haba ïatai halor ka jingkren u Lat ka Jylla, ha ka sngi kaba saw jong ka Dorbar mang Tangka u Bah Bright u la kynnoh ba ki rangïalehkai kiba la ïadon bynta ha ka kynhun ïalehkai ka Jylla ha ka Santosh Trophy jong ka aïom ba la dep, kim shym la ïohpdiang ïa ka baibam wat la na ka liang ka Sorkar Jylla ka la dep kular hadien ba ka Jylla ka la wan ha ka kyrdan ba-ar ha u snem ba la dep.
Nalor nangta, une u MLA ka Mawlai u la pynpaw ba ki don napdeng ki ‘rang ïalehkai kiba la wan ban ïakynduh ïa u dangshen, ki la ïoh biang ban mihkhmat sa shisien pat ïa ka Jylla mynta u snem ha kane ka lympung kaba la long ha Arunachal Pradesh.
Namarkata, u la pynpaw ba ka long kaba donkam ïa ka Sorkar Jylla ban kan pynlut halor ki kam ïalehkai bad kum ki nongïalehkai ki dei ban ïoh ka jingithuh haba ki mihkhmat ïa ka Jylla ha ki lympung ïalehkai hapoh ka ri bad wat shabar ri ruh kumjuh.
