Minnesota, Rymphang:
Ha kane ka jingjia, la ong ba 2 ngut ki heh pulit bad uwei u briew, ki la kyllon iap hapdeng ka jingiakhun bad uwei u runar ha ka Sngi U Blei. Kane ka la jia hapoh Minnesota jong ka United States hadien ba ki pulit ki la ioh ia ka phone haba iadei bad ka jingiakynad kaba jur ha kawei ka longiing kaba don ia bun ngut ki khyllung- khynnah.
Ha katei ka jingjia, la ong ba ia u nongsiat ki pulit kim pat shym la pynithuh ne pynpaw kyrteng, hynrei u la khlad lang noh hapdeng katei ka jingiakhun bad ia baroh 7 ngut ki khynnah rit kiba don ha katei ka iing kiba naduh ka rta ba 2 snem haduh 15 snem, la ioh ban pyllait im lut khlem kano- kano ka jingma ne jingmynsaw ha katei ka jingjia. Hynrei ki pulit kim shym la ai jing pynshai pat ba ha kano ka dur utei u nongsiat ha katei ka jingjia u la kyllon iap lang ialade.
La ong ba kitei ki 2 ngut ki heh pulit kiba khlad ki kynthup ia uwei uba dang 27 snem bad uwei pat uba la don 40 snem ka rta. Kitei ki 2 ngut la ong ba ki la leit her mar-mar sha katei ka jaka tang mar ia ioh ia ka phone na u Lat jong katei ka thaiñ uba la pyntip ba ka don ka jingiakajia ha kawei ka iing kaba don ia bun ngut ki khyllung- khynnah bad kaba long ka jingma kaba khraw ia kitei ki khynnah kiba don hapoh jong katei ka iing kaba don hapoh Burnsville jong ka thaiñ South Minneapolis.
Ha katei ka jingjia, la don sa uwei pat u heh pulit uba la ngat lang ha katei ka jingïather kuli naphang bad ia mynta hi u dang don hapoh ka jaka sumar bad ki doktor ki pyntip ba katei ka jingmynsaw ka long ka bym don jingma ia ka jingim jong u.
La ong ba ka tnat ‘Emergency’ ka la ioh ia katei ka phone lane ka jing ujor ha ka por kumba 1:50 jong ka kylla step Sngi U Blei na kawei ka iing haoph Burnsville, ha kaba la ong ba utei u rangbah uba thaw jingkulmar u la pynthud bad wanrah jingma ia katei ka iing baroh kawei.
Hynrei hapdeng ka jingtrei shitom jong ki pulit ban tehlakam ia katei ka jingiakynad, utei u rangbah la ong ba u la ther kuli pynban sha ki pulit kiba leit poi sha katei ka iing bad kane ka la wanrah ia ka jingïather kuli hapdeng jongki, ha kaba baroh ki la ia kyllon iap lang bad sa tang utei uwei u heh pulit uba dang lait im bad uba shu mynsaw bad uba don hapdeng ka jingsumar haduh kane ka kynti.
