Shillong, Rymphang 21
U MLA ka Mairang Constituency u Bah Metbah Lyngdoh u la kyntu ïa ka Sorkar Jylla ba kan shim khia ha ka ban buddien ïa ki skhim shna madan ïalehkai phutbol lyngba ka Khelo India jong ka Sorkar Pdeng.
Ïa kane u la pynpaw ha ka Dorbar Mang Tyngka ha ka sngi Balang hadien ba ka Sorkar Jylla kam shym la lah ban buddien ha kaba ïadei bad ki skhim shna madan phlang plastik kiba la wan lyngba ka Khelo India, ïa kaba la dep ban mynjur naduh u snem 2022 da ka tnat ïalehkai jong ka Sorkar Pdeng.
Kine ki madan ïaleh-kai phutbol kiba la ïoh ka jingmynjur na ka Sorkar Pdeng ha u snem 2022 ki long ka madan Kurkalang kaba ha Bhoirymbong kaba ha Ri Bhoi District, ka madan Patarim kaba ha Umsning, Ri Bhoi District, madan Wahlyngkhat kaba ha Pynursla, madan Pyndengumïong kaba ha Mairang, bad ka madan ïalehkai jong ka Rangdajied United Football Club ha Mawngap. Katba ka shnong Sohra ka la ioh jingmynjur ban ïohpdiang haduh ar tylli ki madan ïalehkai; kata ka madan phutbol ha Wahsari bad ka Synthetic Athletic Track ha Khliehshnong, Sohra.
“Nga la dep ban ïohi ïa ki thup kyrteng jong ki madan ïalehkai ha ki constituency bapher bapher kiba la ïoh ka jingmynjur na ka Sorkar Pdeng bad katno nga da sngewkmen haba nga ïohi ba ka madan Pyndengumïong ka long kawei na kita ka ban ïoh ïa ka skhim siang phlang plastik, hynrei haduh mynta ym shym la lah ban pynurlong ïa kine ki projek.”
Utei u lamphang barim ka Jylla u la kyntu ïa ka Sorkar ba kan buddien ïa kitei ki projek kiba la wan lyngba ka Khelo India ki ban long ki jingmyntoi na ka bynta ki khynnah kiba don ïa ki ïalehkai jong ka Jylla hi baroh kawei.
“Kumba ngi tip ba kiba kham bun eh na ki nongïalehkai ki dei kiba wan na nongkyndong, te kumta ka long kaba donkam na ki shnong ha nongkyndonn ki dei hok ban ïoh ïa ki madan phlang plastik khnang ba ki khynnah kin lah ban pynpaw ïa ki sap ïalehkai jong ki.”
