Shillong, Rymphang 21
Ka kynhun ïalehkai phutbol ka Jylla ka la mad ïa ka jingshah rem kaba nyngkong ha ka lympung ïalehkai 77th Santosh Trophy, hadien ba ka la shah liem noh ha ka Services da 1-0 kol ha ka sngi Balang ha nongbah Itanagar, Arunachal Pradesh.
Kane ka shi kol jong ka Services ka la wan urlong lyngba ka penalty ba la thep da u Shafeel P.P na ka bynta ban pynlong ïa kane ka kynhun ban khur ïa ki lai point na ka Group-A.
Ha kane ka jingïakhun baroh ar kynhun ki la ïakhun tyngeh naduh kaba sdang ha kaba ki la ïoh ïa ki kabu kiba biang, hynrei kim shym la lah ban thep kol haduh kaba kut jong ka kylla step.
Kumjuh ha ka kylla miet kine ki kynhun ki la ïai bteng ban ïakhun tyngeh ha kaba ki la ïoh ïa ki katto katne ki kabu ksiar, hynrei kine baroh ki la shu long leh nohei. Hashwa ban wai ka Services ka la ñion naphang ban shut sha kol, hynrei uwei na ki rangïalehkai ‘dien ka Meghalaya u la pyndei da ka kti ïa ka bol hapoh ‘box’. Te kumta na ka liang u rephri u la kdew beit sha ka penalty bad dei hangne ba u Shafeel u la ïoh ban thep hi jlang ha ka minit kaba 90+4 bad ban khur syndon ïa ka jingjop.
Ka Meghalaya kan pynkhreh ïa ka jingiakhun kaba ar pyrshah ïa ka Assam ha ka 23 tarik.
Ha kawei ka jingïalehkai kaba ar, ka Kerala kaba don ha kane kajuh ka group, ka la pynliem noh ïa ka Assam da 3-1 kol.
