Chennai, Rymphang:
U nongïalam jong ka liang pyrshah bad u General Secretary jong ka seng AIADMK u Edappadi K Palaniswami u la ñiew ba ka mang tyngka kam long eiei hynrei tang ka jingthaw buit.
Ha ka jingïakren bad ki nongthoh khubor habar ka Assembly, u la ong, “Ka sorkar DMK ka la pynsangeh ïa kiba bun ki jingai jingmyntoi sha ki paidbah ïa kiba la pyntreikam da ka sorkar AIADMK, kum ha kaba ïadei bad ka jingsam ei ïa ki Laptop sha ki khynnah pule, ka Thaalikku Thangam, ka Greenhouse na ka bynta ki briew baduk bad kiwei pat. Nalor kane la sakhi ba ka ram ha ka jylla ka la nang kiew katba nang mih u snem.”
U President jong ka seng BJP ha ka jylla u K Annamamalai u la ong ba ka sorkar DMK ka ju pyntreikam ïa ki skhim jong ka sorkar kmie tad haduh ba kan da dep ban pynkylla kyrteng ïa ki.
U President jong ka seng PMK u Dr Anbumani Ramadoss u la ong ba ka Tamil Nadu ka la lamkhmat ha kaba ïadei bad ka jingkit ram.
Ha kawei pat ka bynta, u President jong ka seng TNCC u K Selvaperunthagai u la ong ba ka jingmang pisa wat lada ka sorkar kmie kam shym la pynbiang ka la long kaba ihun.
U Secretary jong ka seng CPM ha ka jylla u K Balakrishnan u la kdew shai da kaba ong ba kim shym la don kino kino ki jingpynbna pyntreikam kynthup ki skhim Pension kiba rim, bad ka Dana ka bynta ka leit ka wan jong ki nongtrei.
U Secretary jong ka seng CPI ha ka jylla u R Mutharasan, u General Secretary jong ka seng KMDK u ER Eswaran, u nongïalam jong ka seng VCK u M Sinthanai Selvan, u President jong ka TVK u T Velmurugan bad u President jong ka MMK u MH Jawahirullah ki la sngewïahap halor kane ka jingong.
