Guwahati, Rymphang:
Ha kawei ka jingjia kaba la wanrah jingjop, la ïathuh ba ki pulit ki la lap bad ïoh pyllait im ïa lai ngut ki khynnah kynthei kiba dang rit kiba la jah naduh ka sngi Saitjaiñ jong ka taïew ba la dep na la ïing, la ïathuh ka tyllong khubor.
Haba ka la don ka jingujor halor kane ka jingjia ha ka Lah Sngi U Blei, ki pulit ka Pragjyotishpur bad jong ka Panikhaiti ha Guwahati ki la ïasnohktilang na ka bynta ka jingpyntreikam ban leit wad ïa kine ki khynnah rit kiba la jah ha kaba da ka jingjop ki la lah ban pyllait im ïa ki.
Kumba la ïathuh ka tyllong khubor, la ong ba ïa kine ki khynnah rit la ïoh ban pyllait na ka shnong Kamalajari Gaon kaba don ha Sonapur Subdivision jong ka Kamrup Metropolitan distrik ha Assam, kaba don ha ki bynta ba marjan bad ka nongbah Guwahati.
Ïa kine ki khynnah kiba la shah pyllait la tip kyrteng kum ka Riya Timung na Birkuchi, Rashmi Sonar na Bonda, bad ka Rashmi Sarma na ka shnong Amingaon, kine ki dei ki khynnah pule jong ka Raghunath Choudhary Hindi High School ha ka shnong Birkuchi kaba don ha ka nongbah Guwahati.
Kumba la ïathuh ka tyllong khubor, la ong ba kine ki khynnah ki la mih na ïing jong ki ha ka 17 tarik, Rymphang, ha kaba ki la ong ban leit kai sha ïing ki paralok, ha kaba hadien kane kim shym leit phai ïing shuh. Hadien kane ki bahaïing ki la leit ujor sha ki pulit bad nange ki pulit ki la sdang ïa ka jingpyntreikam ban leit wad ïa ki.
