Shillong, Rymphang 21
Ka Sorkar Jylla ka la pynlut haduh T.4 klur tam ban ai jinghikai ïa ki nongïalehkai ka Jylla na ka bynta ka snem mang tyngka 2022-23.
Haba jubab ha ka kynta kylli jingkylli ba la wanrah da u MLA ka Kharkutta konstitwensi, u Rupert Momin, u Myntri ka tnat ïalehkai, Bah Shakliar Warjri, u la ïathuh ba ka sorkar ka la pynlut haduh T.4,16,64,000 ha ka ban ai jinghikai ïa ki nongïalehkai.
Ha kawei pat ka liang u MLA ka Mawlai Constituency u Bah Brightstar Marbaniang u la pan ka jingtip kaba bniah halor ka jingpynlut pynsep na ka bynta kawei-pa- kawei ka district, bad na ka liang u Bah Shakliar u la pynpaw ba ka jingpynlut na ka bynta ka East Khasi Hills ka long T.82,02,000 na ka bynta ka West Khasi Hills ka long T. 23,54,000, South West Khasi Hills ka long T. 30,42,000 Eastern West Khasi Hills ka long T.20,10,000, Ri Bhoi District ka long T. 30,42,000. “Kine baroh ki long san tylli ki district ki long T. 1,86, 50,000,” u la bynrap.
Ha Garo Hills ka jingpynlut na ka bynta ka East Garo Hills ka long T. 26,98,000, North Garo Hills (T.26,98,000), West Garo Hills (T.40,74000), South Garo Hills (T.30,42,000), South West Garo Hills (T.37,30,000). “Kine baroh ki long T. 1,62, 42,000.”
Ha Jaiñtia Hills ka jingpynlut na ka bynta ka East Jaiñtia Hills T. 33,60,000 bad ha West Jaiñtia Hills T.33,86,000. “Kine baroh ki long T. 67,72,000.”
Halor ka jingkylli da utei MLA ka Mawlai haduh katno ngut ki khynnah ïalehkai kiba la shah hikai, na ka liang u Bah Warjri u la ong ba ym lah ban pynpaw haduh katno la ai jinghikai ïa ki khynnah ïalehkai namar kane ka jingpyllait ïa ka mang pisa ka la leit beit sha ki synjuk ïalehkai ba kin pynïaid na ka bynta kiba bun khynnah ïalehkai.
Na ka liang u Bah Marbaniang u la buh biang ka jingkylli la katei ka mang pisa ka dei na ka bynta ki synjuk ïalehkai ne na ka bynta ki khynnah, u Bah Shakliar u la ïathuh ba kane ka mang pisa ka long ban ai jinghikai ïa ki khynnah, hynrei ka pisa ka leit sha ki synjuk ba kin pynïaid.
