Imphal, Rymphang:
Ka kynhun jong ki nongdie madan kiba la rai ban pynlong ïa ka jingïakhih kaba dei ban sdang hynnin ka sngi ka 21 tarik, Rymphang shaneng ban pyrshah jur halor ka jingshahkem jong 6 ngut ki briew, ka la weng noh ïa ka pakhang shnong namar ka jingdon jong ka eksam Higher Secondary School Leaving Certificate (HSSLC) kaba la sdang hynnin ka sngi.
Ki la mih ki jingkulmar hapoh ka Cheirap Court Complex kaba don ha Imphal East hynnin ka sngi naba bun na ki nongïakhih ki la pyrshah jur halor ka jingshahkem jong 6 ngut kiba dei ruh ki riewpaidbah.
Ki pulit jong ka kynhun Rapid Action Force (RAF) ki la siat da ki tyndong lyer pynsat khmat hapoh ka Court Complex ban tehlakam ïa ka jingkhihwin jong ki nongïakhih ha kaba kane ka la pynmynsaw ïa kiba bun ki nongïakhih bad ïa uwei u nongpathai khubor.
