Ranchi, Rymphang:
U Myntri Rangbah barim jong ka Jharkhand u Hemant Soren u la ïakynduh jingeh shuh shuh naba ka Enforcement Directotate (ED) ka la buh sa kawei ka jingmudui pyrshah ïa u ha ka sngi Ba-ar namar ba um shym la kohnguh halor ka jingshah khot hajir jong u ha ka kynhun tohkit.
Ha ka jaka ba un leit mih ha ki 10 tylli ki jingshah khot hajir ha ka ED, u Soren u la leit mih hakhmat ka kynhun tohkit na ka bynta ka jingshah kylli jingkylli tang ar sien, ha kaba kane ka la nang pynsniew bad buh jingeh.
Ki jingshah mudui ki la pynlong ban khot hajir ïa u Soren ha kaba ïadei bad ka jingjia jong ka jingkamai ïa ka spah bymhok kaba don ka jingïadei bad ka kam bamsap kaba la mih na ka jingïathied bad jingïadie jaka.
Kumba la ïathuh ka tyllong khubor la ong ba ka ED ka la pyrshang ban kurup ïa kumba 8.5 akar ka jaka kaba don ha Bargain, ha Ranchi, ha kaba la ong ba la thied beaiñ ïa ka da u Soren na ka bynta ban shna ïa ka Hall ka ban pyndonkam ha ka ban ïabam sngewbha.
Kane ka jingthmu pyntreikam la paw lyngba ka jingkhmih bniah na ki WhatsApp Chat ba la ïoh na ki Mobile Phone jong u nongïarap baïajan bad u Soren u Binod Kumar Singh, ha kaba la paw ba ka la don ka jingthmu ban shna ïa ka Hall.
