Jowai, Rymphang 22
Ka State Council of Science, Technology & Environment, Meghalaya ryngkat ka jingïatreilang bad ka bor pynïaid District, West Jaiñtia Hills District kin pynlong ïa ka ïakop mareh kaba tip kum ka National Science Day Run 2024 ha ka 26 tarik mynta u bnai.
Kane ka jingïakop mareh kan sdang naduh ka por 6:30 baje mynstep na ka bynta ki khynnah shynrang bad kynthei. Kane jingïakop mareh ka long shi bynta ka National Science Day 2024 halor ka phang “Indigenous Technologies for Viksit Bharat”.
Kane ka ïakop mareh kan sdang na khyndop jong U Kiang Nangbah Stadium bad ïaid lyngba ka Ladthadlaboh Main Road, Jowai Public School, Gate Polytechnic, Kshaid Rymphum, Salaroh, Dulong Poh-hali Road, Dulong- Pamhadem, Panaliar (Civil Hospital), Iongpiah , Mission Compound, H.K.Singh School, D.C Office, New Hill-National Highway bad pynkut ha Kiang Nangbah Indoor Stadium.
Ki nongjop ha kane ka jingïakop kin ïoh ïa ki khusnam kyrpang ryngkat ki syrnod bad yn sam ei ïa ki T-Shirt sha baroh ki nongïashim bynta. La khot la wer ïa baroh ki District Association, klob, ki skul bad kolej napoh ka District ban ïashim bynta ha kane ka jingïakop. Ka jingshim kyrteng ïa ki nongïashim bynta kan long ha katei hi ka sngi ha Kiang Nangbah Indoor Stadium, Jowai ha ka por 6 baje mynstep.
