Aizawl, Rymphang:
Ka seng Congress ha Mizoram dang shen ka la dep ban pynlong ïa ka jingthep vote hapoh ka seng ha ka sngi Ba-ar, ha kaba kane ka la wanrah ïa ka kynhun bathymmai jong ki nongïalam jong ka seng na ka bynta ban ai ka jingkyrshan ïa ka seng nangne shakhmat.
U President barim jong ka seng u Lalsawta, hashwa u la dep ban ai ïa ka rai ha kaba ïadei bad ka jingiehnohkam jong u, ha kaba la ong ba kane ka long shi bynta ban ai jingkyrshan ïa ka seng bad ban pynpaw ka jingdon mon jong u ban plie lad na ka bynta ka lawei jong kiba dang wan.
U Lal Thanzara, uba long u Myntri barim, un sa shimti ïa ka kam na u Lalsawta ha ka kyrdan kaba halor hapoh ka seng Congress ha ka jylla.
U Lal Thanzara, uba long u para jong u Myntri Rangbah barim jong ka jylla u Lal Thanhawla, kumba la ïoh jingtip la ong ba u la pynrem ïa u Zodintluanga Ralte, uba long u Myntri barim, da 112 vote ha ka ilekshon hapoh ka seng ha ka sngi Ba-ar.
Kane ka long ka bynta kaba la wanrah ka jingkylla hadien ka jingïakhun ilekshon ha u snem 2023.
