Philippines, Rymphang:
Katkum ki khubor la iathuh ba 15 ngut ki la duh noh ia ka jingim hadien ba kawei ka trok ka la leit hap sha ka riat bad ka khlaw kaba don ha ki phang pdeng jong ka Philippines.
La ong ba katei ka trok ka dei kaba kit ia ki katto katne ki briew bad ki jingri kiba im hapoh jongka ha ka jingleit sha katei ka dew lynnong Negros, la iathuh uwei na ki heh ka tnat iarap na Mabinay.
Ki nongsakhi ha katei ka jingjia ki iathuh ba katei ka trok ka la pynher stet bha bad ha mar ba ka poi ha katei ka bynta ba khylliap bad ba khun jong katei ka surok, kam lah shuh ban tehlakam bad kumta ka la leit suh beit- beit sha katei ka riat kaba don shapoh jong ka surok. La ong ruh ba kitei ki thaiñ lum jong ka Mabinay ki long kiba ju mad khah- khah ia kum kine ki jingjia ba sniewbok namar ka jingbym shngaiñ jong katei ka surok.
Napdeng ki 17 ngut kiba don ha katei ka kali, tang uwei u pasenjar uba lait im ha ryngkat bad u nongñiah jong katei ka kali ha katei ka jingjia.
Ia u nongñiah jong katei ka kali la shem na trai jong katei ka jaka riat ha ryngkat ka umphniang kaba la jreiñ bad hoit ha u baroh shi rynieng hadien ba u la thiah iapler ha katei ka jaka, kumba 50 Metre lane 164 phut shapoh na katei ka surok ba katei ka trok ka hap.
Hynrei la ong ba ki jingjia aksiden kiba shyrkhei ki ju jia man ka por hapoh ka ri Philippines, ha kaba ki nongñiah kali ruh kim ju salia ia ki kyndon bad ki adong ba la buh bad dei kane ka daw kaba wanrah ia kum kitei ki jingjia ba sngewsih namar ka jingbym salia jong ki nongñiah kali ia ki aiñ ñiah kali ha kitei ki surok ki bym shngaiñ jong ka Philippines.
