New Delhi, Rymphang:
Ka Enforcement Directorate (ED) ka la pynmih ïa ka jingkhot hajir kaba thymmai ïa u Myntri Rangbah jong ka Delhi u Arvind Kejriwal, ha kaba la hukum ïa u ba u la dei ban leit mih hakhmat ka kynhun ha ka 26 tarik, Rymphang na ka bynta ban kylli jingkylli ïa u ha kaba ïadei bad ka jingdon jong ka jingkamai spah bymhok kaba la mih na ka jingpyndkoh treikam ha ka tnat Excise, la ïathuh ki heh jong ka kynhun tohkit hynnin ka sngi.
Ka kynhun tohkit jong ka sorkar kmie, ha ka por ba ka la phah ïa kane ka shithi khot hajir kaba hynñiew hapoh ka jingtreikam jong ka Prevention of Money Laundering Act (PMLA), ka la kyntait halor ka jingong ba kane ka jingkhot hajir biang ïa u ka long kaba bakla namar kine kiei kiei baroh ki la long hapoh ka jingkhmih bniah bad ka hukum jong ka ïingbishar.
U Kejriwal u la shah bthah ba u la dei ban leit mih hakhmat ka kynhun ha ka 26 tarik, Rymphang bad ban phla ha kaba ïadei bad ka jingdon jong ka jingkamai ïa ka spah bymhok lyngba ki rukom pyntreikam kiba ha ka tnat Excise, la ong ka tyllong khubor.
Ka ED dang shen ka la phah biang ïa ka jingmudui pyrshah ïa u Kejriwal halor ka jingbym kohnguh jong u ïa ki jingkhot hajir ha kaba ïadei bad kane ka mukotduma.
Ka ïingbishar ka la buh tarik ban bishar bniah halor kane ka jingjia ha ka 16 tarik, Lber naba ka la map ïa u na ka jingbym leit mih hakhmat ka kynhun ha ka taïew ba la lah.
Ka ïingbishar ka la ong ruh ba na ka jingkhmih bniah halor ka jingmudui bad na ka jingring sur jong ka ED, ka jingmudui kaba la shah pynngat hapoh ka kyndon 174 jong ka Indian Penal Code (IPC) ka la don bad ki la don ki bynta ha kaba ka jingpyntreikam kan ïai bteng ha ka ban pynibor pyrshah ïa une uba la shah kynnoh (Kejriwal).
Katkum ka jingpynshisha jong ka kynhun ED ka la ong ba ka ïingbishar ha ka jingbishar bniah kaba hashwa ka la dep ban pynrem ïa u Kejriwal ha kaba u la leh ïa kaba bakla naba u la leh bymkohnguh halor ki jingshah khot hajir kiba hashwa ba la phah sha u halor kane ka mukotduma ha kaba ka la don ka jingkhot hajir kaba ha ka sien kaba hynñiew, la ïathuh ka tyllong khubor kaba la wan na ka kynhun tohkit.
