Srinagar, Rymphang:
Ka Central Bureau of Investigation (CBI) hynnin ka sngi ka la pynlong ïa ka jingleit khynra ha palat 30 tylli ki jaka kiba kynthup ïa kito kiba don ka jingïadei kam bad u Lat barim jong ka jylla Jammu & Kashmir u Satya Pal Malik naba u la shah kynnoh donkti ha ka jingjia ba la don ka kam bamsap halor ka jingai kontrak kaba la kot sha ka T. 2,200 klur jong ki Civil Works jong ka Kiru Hydro Electric Power Project (HEP) sha kawei ka kompeni jong ki riewshimet ha Union Territory.
Ki briew kiba don jingtip shaphang kane, ki la ong ba ki jaka sah bad shlem treikam jong u Malik ki la shah khynra kum shi bynta ban ïaid shakhmat ha ka jingtohkit, ha kaba ka la ïaid naduh u Ïaïong jong u snem 2022. Ka 624-megawatt Kiru Project ka dei ka skhim pynïaid um ha ka wah Chenab kaba don ha Kishtwar distrik.
U Malik, uba long u Lat jong ka Jammu & Kashmir naduh u Nailar jong u snem 2018 haduh 2019, u la shah pynshisha ba u la shah tyrwa da kumba T. 300 klur ka pisa na ka bynta ban pynkhuid ïa ar tylli ki File, kynthup kawei kaba dei shaphang ka Power Project.
Ka kynhun CBI ka la buh jingthoh halor kane ka jingjia ha ka 20 tarik, Ïaïong, 2022, da ka jingai hukum jong ka sorkar Jammu & Kashmir halor ka jingkynnoh ba ka la don ka jingleh thok ha kaba ïadei bad ka jingai kontrak ha u snem 2019.
Ka kontrak ka dei kaba la ai khlem da bud ïa ki kyndon ba la buh ha kaba ïadei bad ka jingkhot ban pyntreikam.
