Moscow, Rymphang:
Ka tnat FSB jong ka Russia ha ka Sngi Balang ka la pyntip ba ka British Council, kaba long ka tnat Education & Culture jong ka UK, ka la leit syntiat ia ka Russia bad phah pat ia kitei ki jingtip ba ka ioh lum sha ka tnat syntiat jong ka Ukraine.
Ka Russia ka la kynnoh ruh ba katei ka tnat na UK, ka la bud dien bad syntiat ia ka Russia naduh ki snem 2018 bad ka la wad jingtip bha bin pa bin khamtam ia ka jinglong jingman ha ki bynta jong ka nongbah Kherson kaba la ioh kurup bad synshar hi da ki shipai ka Russia.
Kumta, la ong ba lyngba jong kito ki seng bad ki tnat kiba don hapoh ka bor jongka, ka Britain ka la ialeh ban lum jingtip bad tih bniah shaphang ki kam- ki jam bad ki jingthmu jong ka Russia baroh khnang ba kan ioh ban phah pat ia kitei ki jingtip baroh sha ka Ukraine.
Hynrei la ong ba haba iadei bad kane, katei ka tnat syntiat jong ka Britain kam shym la kren ne pynphai ktien eiei tad haduh ka step Sngi Palei ba la pynmih ia kane ka khubor.
Shuh shuh ruh ka FSB ka la pharep ba katei ka tnat ka ju pyndonkam da kito ki phetwir nong Ukraine kiba shong ha UK khnang ban ioh ia ki jingtip kiba bun pat lyngba jong kitei ki phetwir na Ukraine bad kito ki nong Ukraine kiba don hapoh ka nongbah Kherson.
Kumta ruh ka FSB ka la iathuh ba ka dang wad bniah bad dang peit thuh bha ban lap ia kiei kiei baroh bad lada ka lap ia kum kitei ki jingleh buit poh jong kino- kino ki bor ba nabar jong ka Russia, kan pynshitom bad kan pynngat kyndon pynkheiñ aiñ ruh ia kitei kiba don kti ne kiba iatrei lang bad kitei ki tnat ba nabar jong ka ri.
Ia ka British Council la seng ha u snem 1934 bad ka la ioh ia ka bai seng na ka sorkar United Kingdom (Britain) hynrei ka ioh pat ban treikam laitluid ha la ka jong ka mon.
Ka Russia ka la dep khang ruh ia ka British Council naduh u snem 2018, hadien ba ka London ka la kynnoh ia ka Russia ba ka Russia ka ai bih ia u nong syntiat barim ka Russia- u Sergei Skripal bad ia ka khun jong u – ka Yulia ha kitei ki snem.
