Ahmedabad, Rymphang:
Ka sorkar Gujarat ha kine ki khyndiat sngi ba la leit ka la ong ha Assembly ba ha ka 31 tarik, Nohprah, 2023, ki la don kumba 341 tylli ki skul Primary jong ka sorkar ha ka jylla kiba la treikam tang ha kawei ka kamra.
Kane ka la long wat lada ka sorkar jylla ka la pynbna ka jingïarap pisa kaba T. 43,651 klur na ka bynta ka tnat pule-puthi ha u snem 2023-24.
Kane ka jingai jubab jong ka sorkar ka la long hadien ka jingbuh jingkylli hapoh Assembly na u MLA ka seng Congress na Patan u Kirit Patel.
U la kylli na u Myntri ka tnat pule-puthi ha ka jylla haduh katno tylli ki skul Primary ha Gujarat kiba don tang kawei ka kamra na ka bynta baroh ki klas.
Ka sorkar ka la ong ba ka jinglong jong kine ki skul ha kane ka rukom ka la long na ka jingdon bun jong ki khynnah bad ka jingduna jong ki nonghikai, nalor kane la ong ba ki la don kumba katto katne tylli ki kamra klas ïa kiba la shu ieh thylli namar ka jingtor bad khyllem noh.
Shuh shuh ka sorkar ka la ong ba ka jaka kam biang na ka bynta ban pynheh ïa ki skul.
Ka sorkar ka la ong ba kam ïoh ïa ki nonghikai ban thep kam ha ki jaka ba lait.
Ha ka jingai jubab ha kaba ïadei bad kawei pat ka jingbuh jingkylli jong u MLA ka seng Congress, ka sorkar katkum ka jingïohlum jingkheiñ ha ka 31 tarik, Nohprah, 2023, ka la ong ba ki la don kumba 439 tylli ki post ba lait ha Gujarat Education Service klas-1 bad 1,020 tylli ha ka klas II.
