Nongstoiñ, Rymphang 22
Ka Blue Bomber’s ka la jop ha ka jingïakhun semi final (wat nyngkong) jong ka lympung ïalehkai Invitation Knockout Football Tourna-ment 2023-24 ba la pynlong da ka New Nongstoiñ Sports Social & Cultural Club.
Kane ka jingjop jong ka Blue Bomber’s ka la wan ruh hadien ba ka la ïoh ban khyrwit kylla ban pynliem noh ïa ka Shillong Lajong da 4-3 kol ha ka sngi Thohdieng jingialehkai ha madan New Nongstoiñ.
Kane ka nam jop ka la wan urlong lyngba u Stephan Pale bad u Owan Pajuh.
Ha ka jingshisha, dei ka Shillong Lajong kaba ïoh ïa ka kabu ksiar ban khur lehse ïa ka jingjop ha katei ka jingïalehkai hadien ba ka la ïoh ban thep haduh 3 kol ïa ka Blue Bomber’s katta ha ka kylla step ha ka minit kaba 7, 26 bad 30, hynrei phewse haba sakhi pat ha ka kylla miet ka Blue Bomber’s ka la ïoh ban pynphai kylla haduh 4 kol ïa kaba la ïoh ban thep da u Stephan Pale ha ka minit kaba 56 bad 62, katba ïa ki ar tylli ki kol pat la ïoh ban thep da u Owan Pajuh ha ka minit kaba 59 bad 83.
Wat la ka Shillong Lajong ka la mad ïa ka jingshah rem, hynrei ka dangdon pat ïa ka lad ha kaba kan hap biang ban ïakhun tyngeh sa shisien pat ïa ka Blue Bomber’s ha ka wat kaba ar (wat ba ar) semi final jong katei ka lympung.
Ha katei ka sngi ïa ka nam Man of the Match la ïoh ban khur da u Owan Pajuh na ka kynhun ïalehkai jong ka Blue Bomber’s.
