New Delhi, Rymphang:
Da kawei ka rai, ka kynhun jong ki nongrep kiba la pynlong ïa ka jingïakhih ki la rai ban pynsangeh shwa ïa ka jingïakhih da kumba 2 sngi hadien ka jingïap jong uwei na ki nongïakhih ha ka por ba la don ka jingïakynad bad ki pulit.
Une u nongrep u la ïap ha khappud Khanauri kaba don ha Haryana, ha kaba ki nongrep kiba la pynlong ïa ka jingïakhih ki la ïakynad bad ki pulit ha ka janmiet jong ka sngi Balang ha kaba ki nongrep ki la pynsangeh shwa ïa ka jingïaid paidbah sha Delhi na ka bynta ar sngi lynter.
Ka kynhun jong ki nongrep ka AIKS (All-India Kisan Sabha) ka la pynshisha da kaba ong ba ka jingïap jong u nongrep ka la long ha ka por ba la pynibor da ki pulit.
Ha kaba ïadei bad kane, ki nongrep ki la rai ban nang ïai bteng shuh shuh ïa ka jingïakhih jong ki.
U doktor ha kawei ka jaka ai jingsumar kaba ha Patiala, ha kaba la pynkit ïa une u nongrep, u la ong ba une u nongrep u la mynsaw na ka jingdei kuli.
Haduh ba la thoh ïa ka khubor ym pat lah ban pynshisha shuh shuh halor ki daw jong ka jingïap jong u namar ba ka jingpyntreikam ka dang ïai bteng.
“Ki la don lai ngut ki nongpang kiba la wan sha ngi na Khanauri. Uwei napdeng jong ki u la ïap noh ha ka por ba dang pynpoi ïa u ha ka jaka ai jingsumar, kiwei pat ki arngut ki la kham ïoh bor bad kumba la khmih bniah hashwa la ong ba la i kumba une u nongrep u la don ki dak mynsaw na ki bynta jong ka khlieh, hynrei haduh ba la thoh ïa ka khubor ym pat lah ban pyntikna namar ba ym pat dep ban leh ïa ka Post-Mortem,” la ong u Dr Rekhi, uba long u Senior Medical Officer jong ka Rajendra Hospital kaba don ha Patiala.
Ïa une u nongrep uba la ïap la tip kyrteng kum u Shubh Karan Singh, uba la mynsaw jur na ka jingpynibor jong ki pulit, une u la khlad noh na ka jingmynsaw jur ha Government Rajindra Hospital ha Patiala.
Ka jingïap jong u ka la long na ka jingpynibor jong ki pulit,” la ong ka jingthoh ba la wan na ka AIKS.
U Shubh Karan Singh, uba la 23 snem ka rta u dei u nongshong shnong jong ka Bathinda.
