Mawkyrwat, Rymphang 22
Kum shibynta ban kyntiew shuh shuh ïa ki khynnah ha ka sap ïalehkai phutbol, ka Mawkyrwat District Sports Association (MDSA) ka la rai ban kynthup lang noh sa ïa ka lympung ïalehkai Fourth Division League naduh mynta ka aïom.
Kane ka rai ka la wan hadien ba la ïoh jingmynjur na ka Executive Committee jong ka MDSA. Kumta ka Football Committee ka la pyntip ruh ba ha kane ka jingïalehkai 4th Division yn shah tang ïa ki khynnah kiba hapoh 18 snem karta bad yn pdiang tang 20 tylli ki kynhun. Na kine ki 20 tylli yn pdiang thymmai sa tang 12 tylli ki kynhun namar 8 tylli ki la don lypa kiba shah pynhiar na ka 3rd Division League 2023.
Namar kata, ka komiti ka khot bad wer ïa ki klob kiba kwah ban pynïasoh (affiliate) bad ka MDSA ha kane ka 4th Division, ki lah ban pynpoi noh ïa ki aplikeshon sha u Secretary lane Chairman ka komiti jong ka MDSA hapoh ka 11 tarik u Lber. Ka MDSA ka la pyntip ruh ba na ka bynta ki 12 tylli ki kynhun kiba thymmai yn pdiang tang ïa kiba biang ki kot ki sla hadien ba ka komiti kan peit bad bishar bniah ïa ki.
Ka komiti ka la pyntip ruh ba ki jingdonkam ki long ka Resolution, ka Registration jong ka klob, NOC na ka Dorbar Shong bad ïa ki jingtip bakham bniah ki la ban phone ha u number 9366986039.
