Shillong, Rymphang 22
U Mohammed Shami un duh ïashim bynta ha ka Indian Premier League ka ban sdang ha u bnai ban wan na ka daw ka jingmynsaw ka kjat kadiang bad un hap ban leit shah sumar sha UK.
Une u rangïalehkai ba la 33 snem ka rta bad uba la don mynta bad ka kynhun ïalehkai ka ri ha ka jingïalehkai Test pyrshah ïa ka England, u la mihkhmat khatduh ïa ka India ha ka final jong ka ODI World Cup pyrshah ïa ka Australia ha u Naiwieng jong u snem ba la lah.
“U Shami u la don ha London ha ka taiew ba khatduh jong u Kyllalyngkot na ka bynta ban ïoh ka jingshah ai injek halor katei ka jingmynsaw bad un hap ban leit biang hadien lai taiew.”
“Hynrei katei ka dawai injek kam shym la treikam bad mynta ka long sa tang ba un hap ban leit sha puid. Te kumta shen un hap ban leit sha UK na ka bynta ban pyndep ïa katei ka jingshah sumar. Ka IPL ka long shabar na ka bynta jong u,” la pynpaw uwei na ki heh ka BCCI.
U Shami, uba long u rangïalehkai ba kynsai ka India ha ka World Cup da kaba khur 24 wiket, u la ïalehkai hapdeng ka jingpang bad u la shem jingeh ban ïalehkai bha na ka bynta kane ka kynhun ha kane ka jingïalehkai Test.
U Shami, uba dangshen u la shah pynkup burom da ka khusnam Arjuna Award, u la lah ban khur haduh 229 wiket ha ka Test, 195 wiket ha ka ODI bad 24 wiket ha ka T20 ha ki shiphew snem ba la lah.
Kane ka jingmynsaw ka la mih ka jingkylli halor ka Injury Rehabilitation Management Programme ba la buh da ka National Cricket Academy (NCA) na ka bynta u Shami.
Te kumta kane ka la buh jingeh ïa u ba un wanphai biang na ka jingbynta ka India ha ka jingïalehkai Test ha la iing pyrshah ïa ka Bangladesh bad ka New Zealand, kiba la thmu ban long ha u Risaw bad Naiwieng mynta u snem.
“Ha ka jingshisha naduh kaba nyngkong u Shami u la dei ban shah puid namar ban shu ai tang ka injek kan ym lah ban ïarap eiei ïa u,” la ong ki khubor.
